DERROTA CONTRA O CASTRIZ

Partido intranscendente o disputado na tarde do domingo entre o CD BAIO e a SD CASTRIZ, na que os dous só se xogaban a honra dos puntos, e como tal demostrouse unha falta de intensidade en moitos momentos do encontro. Afrontaba o Baio o partido logo de disputar no día anterior o partido de Copa fronte ao Esteirana, no que xogaron case os mesmos homes, completando a formación varios xuvenís, que tamén tiveran partido na tarde do venres, polo que se deixou sentir certo cansanzo nas filas locais, sobre todo na segunda parte.

Os xogadores do Baio apoiaron a MC, desexando que pronto volva marcar goles. (Foto: Santi Díaz)

Antes do partido chegou a nota positiva do encontro ao saíren os xogadores baieses cunha camiseta de apoio ao seu dianteiro Martín MC, operado do menisco o pasado xoves no Hospital Santa Teresa da Coruña. A primeira parte apenas tivo xogadas de mención, cun Castriz pechado atrás e o Baio movendo o balón na busca dos seus dianteiros, que non conseguían desbordar a tupida defensa xalleira. Quizais a ocasión máis clara tívoa Lucas, que se foi en velocidade do seu par pero o seu lanzamento foi atallado por Herrera sen moitas dificultades. Os visitantes só se achegaban á área do xuvenil Guillermo a través do balón parado, sen conseguir impoñerse á defensa nas súas tentativas.

Partido con moito xogo áereo, pero a defensa baiesa
por veces foi unha muralla. (Foto: Santi Díaz)

Non mellorou o partido no segundo tempo, pero houbo máis ocasións, sobre todo no bando local que se achegaba algo máis á portería contraria, sobre todo no lanzamento de faltas directas. O Castriz seguía ao seu, ben pechado atrás e agardando nunha contra ou nun balón parado crear perigo. E así chegou o gol visitante, nunha falta botada no medio do campo á área, o balón escápalle das mans a Guillermo e cáelle na cabeza a Pablo, que só ten que empurrala á rede. Tentou o Baio ir máis arriba polo menos na busca do empate, pero a rigurosa expulsión de Mario por dobre cartón amarelo (min. 77), deixou tocado aos locais. Aínda así puido empatar un insistente Javi Suárez, que tras canear a varios contrarios era derrubado na área, sinalando o colexiado penalti. Lanzouno o propio dianteiro baiés, pero Herrera atinou ben na dirección e conseguiuno interceptar. Non tivo máis historia o partido e os puntos foron para terras xalleiras. Tan só hai que destacar un novo debut no Baio, neste caso de David.

Con esta derrota o Baio segue na sexta posición a falta de tres partidos para o final, pero pensando máis na Copa que na propia competición ligueira.

Polo CD BAIO xogaron: Guillermo, Matías, Yago, Fredi (José Antonio 45'), Ramón, Eloy (David 45'), Mario, Lucas (Pardo 74'), Martín, Javi Suárez, Valentín (Andrés 82').