VITORIA NO DÍA DAS FESTAS!!!

C. D. BAIO 3 - MAZARICOS C. F. 1



ÁNIMO VALENTÍN!!! [Foto: Santi Díaz]

Coincidindo co último día das festas de Baio disputouse á última hora da tarde do domingo o partido da segunda xornada da Liga da Costa entre o CD BAIO e o MAZARICOS CF. E, en contra do que é habitual nas festas, os locais conseguiron sacar adiante o partido con máis facilidade da prevista, e iso que contaban con algunha baixa de consideración (entre elas, a do mancado Valentín, a quen os compañeiros deron ánimos ao comezo do partido, logo da rotura de tres dedos do pé no trofeo do Concello de Zas). Na alineación titular figuraban tan só tres xogadores maiores de 22 anos, e dos oito restantes, dous aínda en idade xuvenil. Iso non foi óbvice para que demostrasen unha clara superioridade ante un opoñente que apenas creou perigo, e tan só se achegou á meta local nos minutos finais, cando as forzas empezaron a fraquear nos baieses.

Momento do penalti a Norberto, "o motor" do novo Baio
[Foto: Santi Díaz]

Comezou o partido moi nivelado, como querendo gardar forzas para os noventa minutos, con moitos minutos de centrocampismo e sen chegar ás áreas rivais. Foi chegando á media hora de xogo cando os locais intensificaron o seu dominio e comezaron a pisar con perigo a área rival. Tivo Martín MC unha oportunidade moi clara, nun man a man co porteiro, que este sacou milagrosamente a córner. Sería o preludio do primeiro gol, que naceu dunha falta na beira da área a Norberto cando se internaba por velocidade; sacou a falta con pillería Martín sobre o propio Norberto e cando ía rematar era derrubado na área, sinalando o colexiado o conseguinte penalti. Encargaríase de transformalo con templanza Martin MC. Tivo o Mazaricos algún achegamento tímido nestes minutos finais, pero a sensación de perigo dábana a rápidas internadas de Martín MC e do xuvenil Christian, que aproveitaban a súa velocidade para desarbolar a defensa mazaricán. Con todo, non conseguían finalizar con claridade as xogadas e chegouse ao descanso coa vitoria mínima.

Martín MC transformando o penalti. Que toque!!!
[Foto: Santi Díaz] 

Comezou a segunda parte polo mesmo camiño, co Baio dominando o balón e cos visitantes pechados na busca dunha contra, pero serían os locais os que desen o golpe definitivo. Nun balón á banda sobre Christian, este consegue irse dos seus opoñentes e ve desmarcado no segundo pau a Martín MC, enviándolle un pase medido co exterior e este non ten máis que axustar o seu disparo á base do poste para poñer o segundo no marcador. Tería Martín MC algunha oportunidade máis moi clara antes de anotar o seu terceiro e mellor gol da tarde, cunha preciosa vaselina sobre a saída do porteiro. Tamén Christian deu mostras da súa gran calidade, deixando algunha xogada das súas que non chegou a materializarse. No último cuarto de hora, e a pesar dos cambios realizados por Félix, o Baio perdeu o control do partido e os visitantes intentaron achegarse á portería de Manuel. O gol acadado por Aldo cando faltaban oito minutos para o final deulle azos aos mazaricáns para iren na busca da remontada, pero a seguridade da zaga local evitou males maiores.



Cachopo e a súa zurda debutaron
co primeiro equipo [Foto: Santi Díaz]

Christian, non hai
palabras [Foto: S.D.]

Xa que logo, primeira vitoria do Baio nesta liga, logo do desafortunado debut da semana pasada, que ademais deixa boas sensacións deste equipo moi novo pero con gran calidade para facer un fútbol preciosista, e con perigo cara á porta contraria se Martín MC está de bo pé. Hai que destacar esta semana tamén o debut co CD BAIO do cabanés Chema, por quen parece que non pasan os anos e volveu dar mostras da súa calidade e seguridade; e dos xuvenís Cachopo e Christian, que fixeron un moi bo partido. Agora a agardar estas tres seguintes xornadas de enfrontamentos contra equipos muradáns, comezando o próximo domingo coa visita a Miraflores ante o equipo da capital municipal.

 

Polo CD BAIO xogaron: Manuel, José Antonio (Pardo 77'), Chema, Mario, Cachopo, Yago, Norberto, Rubio (Eloy Vilas 54'), Martín (Fachal 74'), Martín MC, Christian.

 

Goles: 1-0 Martín MC (35', p.), 2-0 Martín MC (55'), 3-0 Martín MC (71'), 3-1 Aldo (82').

Martín MC, "a figura" do partido.
[Foto: Santi Díaz]