Martín MC, outra vez decisivo cun hat-trick |
Moi
bo ambiente no San Paio de Refoxos para ver un dos clásicos do
fútbol da Costa entre o UC Cee e o CD Baio, con máis de 200
espectadores nas bancadas, nunha tarde de sol e boa temperatura. Un
partido no que o Baio dominou durante os noventa minutos, mostrándose
superior ao seu rival, que agardaba nas contras meterlle medo aos
baieses, pero poucas oportunidades tivo de facelo.
Nos
primeiros minutos foise achegando o Baio con algún lanzamento
lonxano que non entrañaba perigo, ata que chegou unha dobre
oportunidade, primeiro nas botas de Martín MC que remataba a
queimarroupa e conseguía rexeitar Paulo e o posterior remate de
Bieito, moi forzado, foise alto (min.11). Nunha xogada de Javi Suárez
pola banda remata cun centro que é interceptado pola man dun
defensor e o colexiado indica o correspondente penalti. Encárgase de
lanzalo Martín MC, pero o seu forte disparo bate no traveseiro e
despexa a defensa (min.16). Un novo balón ao pau largueiro da
portería ceense veu froito dun centro de Isaac que se envelenou e
acabou petando no poste (min.31). Tivo unha gran ocasión o Cee nas
botas de Martín, que lle gañou as espaldas á defensa pero o seu
tiro sacouno Diego cos pés (min.37). Foi o prolegómeno do primeiro
gol da tarde, que veu dunha xogada individual de Martín MC, que se
desfixo de varios defensas na frontal da área e colocou con clase o
balón pegado ao poste (min.40). Puido empatar o Cee na súa mellor
ocasión, nas botas de Juan que se presentou ante Diego, pero o seu
disparo saíulle algo mordido e non tivo dificultades o porteiro
baiés para atallar o balón (min.42). Con vantaxe mínima para os
visitantes chegouse ao descanso.
Máis
abrumador foi o dominio dos baieses na segunda parte, e máis tras a
expulsión de Nico aos dez minutos da reanudación ao ver o segundo
cartón amarelo. Minutos despois chegaría a sentenza nunha nova
xogada individual de Martín MC, que tras sortear varios defensores
lanzou un forte disparo desde fóra da área que se coou na meta
ceense (min.60). A partir de aquí pouco fútbol, pois o Cee baixou
os brazos e o Baio limitouse a deixar pasar o tempo. Houbo un
terceiro disparo ao traveseiro, neste caso nas botas de Rubio,
despois dunha internada na área (min.72). E cando esmorecía o
encontro, nunha falta na media lúa da área, Martín MC convertía
un novo hat-trick, e poñía o definitivo 3-0 (min.88).
Vitoria
importante nun campo sempre difícil, pois de feito é a primeira vez
que os baieses se impoñen en campo ceense na Liga da Costa, que
supón sumar tres puntos máis para continuar na boa xeira e manter a
diferenza co Corme, que a vindeira semana visitará o Platas Reinoso,
nun duelo que se presume decisivo para a sorte desta competición.
XUVENIL:
C.D. BAIO 2 – OUTES F.C. 1
Partido
dos oitavos de final da Copa da Costa Xuvenil, nunha eliminatoria a
partido único, que supón a clasificación dos baieses para os
cuartos de final. A pesar das imprecisións iniciais, o Baio foi
superior no primeiro tempo, e nel chegou o gol de Estefan, despois
dunha xogada persoal (min.13). E tivo ocasións para incrementar a
súa vantaxe, pero con ese único gol chegouse ao descanso.
No
segundo tempo veuse arriba o Outes que puxo en complicacións aos
locais, que se viron pechados no seu campo. Pero tampouco dispuñan
de grandes ocasións, e tan só en balóns parados poñían o medo no
corpo, pero moi seguro Julián, facíase con todos os balóns.
Arriscaron os outienses nos trocos, e aproveitouno o Baio para marcar
o segundo por medio de Luis (min.66), que sentenciou o encontro. A
partir de aí puido marcar algún gol máis á contra, pero non
estiveron atinados os baieses. Xa no desconto, un erro defensivo
provocou unha perda de balón que acabou nun penalti que transformou
Simón, sen tempo para máis.
A
vindeira semana recibirán os baieses no Platas Reinoso ao CF
Pedreiras Xuvenil, actual campión da Liga da Costa, que tivo máis
problemas dos previstos para desfacerse do Monte Louro nos oitavos.
No hay comentarios:
Publicar un comentario