NON HOUBO ABRELATAS

C.D. BAIO 0 - U.D. CERQUEDA 0

O Baio non mollou ante o Cerqueda

Última xornada do ano 2016 a vivida este domingo no Platas Reinoso, que presentou a peor entrada da temporada, cuns 150 espectadores nas bancadas, a pesar de que o sol estivo presente en case todo o encontro, aínda que a sensación térmica era de frío. E fríos tamén quedaron os espectadores baieses que viron como o seu equipo perdía dous puntos no que puido ser tamén o seu peor partido como local. Enfronte un Cerqueda ordenado atrás, que veu buscando un empate e ao final logrou o meritorio punto. 

A crónica do encontro hoxe é sinxela: un Baio espeso que non atopou nunca frescura nas súas combinacións e que batía cun Cerqueda ben plantado atrás e que deixaba en punta a Lorenzo, para aguantar o balón e agardar a incorporación dos seus compañeiros, aínda que con escaso éxito atacante. E é que escasas foron tamén as ocasións, tan só podemos mencionar un zapatazo de Moreno que se coaba pola escuadra, pero a estirada de Diego Dourado enviando a córner impediu o gol (min.38). A pesar de que o intentaron os baieses e chegaban ás inmediacións da área, faltaba o pase final ante a aglomeración de homes visitantes.

Na segunda parte máis do mesmo; aínda que o Cerqueda cruzou o centro do campo nalgunha ocasión, as súas chegadas tampouco entrañaban moito perigo, con Méndez agora como punta de lanza. Pero tampouco os locais conseguían crear xogadas claras de gol, e os dianteiros tiñan que zafarse de varios adversarios para poder ter posibilidade de disparo a portería. A mellor ocasión da segunda metade foi un lanzamento desde o pico da área de Martín MC que se foi alto lambendo o traveseiro (min.75).

En definitiva, dous puntos que quedaron no camiño que fan que o Corme quede en solitario na cabeza e achégase o Mazaricos perigosamente por detrás, a só tres puntos. Pero hai que dar por bo o resultado e seguir confiando neste equipo pois un mal día teno calquera. O próximo partido será xa despois das vacacións, en Laxe, para pechar a primeira volta.

Ficha do partido da FGF
Clasificación da Liga da Costa

XUVENIL: C.D. BAIO 1 - PONTECESO S.D. 3

Na tarde de venres disputábase o encontro da antepenúltima xornada do Grupo Norte da Liga da Costa Xuvenil, entre o Baio e o Ponteceso. Chegaban os visitantes cunha xeira impresionante de resultados que os convertía nun equipo temible, pero en Baio tiveron que suar para levar os tres puntos. Tan só ao final e cun home máis foron quen de sentenciar un partido que se mantivo igualado en boa parte del. A primeira parte rematou cun solitario gol visitante obra de Aarón, que chegou ao pouco de inciarse o partido (min.4).

Estiveron os baieses no encontro, pero o dobre cartón a Regueira aos vinte minutos da segunda parte, fixo que o Ponteceso encontrase máis fácil o gol, e este chegou en desafortunada acción en propia meta a quince para o final. Tres minutos máis tarde Luca sentenciaba, pero aínda o Baio marcaría o da honra por medio de Estefan (min.87), cando se igualaran as forzas polo dobre amarelo de Jorge dous minutos antes.

Tras o parón navideño retomarán a competición en Coristanco, equipo que parece destinado a ocupar a terceira praza que dá acceso á segunda fase ligueira, aínda que tamén depende do partido desta xornada que xogará o venres próximo en Corme. Dese partido tamén estarán pendentes os baieses, por canto o Corme é o único rival que poden superar na clasificación, toda vez que se asegurou a sexta praza. 

Ficha do partido da FGF
Clasificación do Grupo Norte

PREVIA DO CD BAIO-UD CERQUEDA

A Historia

C.D. BAIO
TOTAL LIGAS + COPAS
P. X.	P. G.	P. E.	P. P.	G. F.	G. C.
1795	693	417	685	2942	2985
TOTAL LIGAS
1571	601	361	609	2505	2618
LIGA DA COSTA
809	319	156	334	1473	1545

Fundado en 1980, a UD Cerqueda disputa coa actual a súa 18ª temporada. E é que ese club nacido no inicio década oitenteira (na época de febre futbolística na Costa, na que naceron moitos clubs: 16 entre 1979 e 1981, sen contar filiais) tivo dúas etapas na súa vida: unha primeira que durou ata a 1985-86, e unha segunda que se iniciou na 2005-06 e que chega ata a actualidade. Esas temporadas colócano no 33º posto entre os clubs costeiros, pero se falamos de partidos xogados cae unha posición para ser 34º. A maioría desas campañas foron na 3ª Autonómica, un total de 11, mentres que na Liga da Costa disputa coa actual a súa 7ª. Isto fai que sexa 36º en canto a número de temporadas e 35º en partidos xogados na liga costeira por antonomasia. Nas súas vitrinas atesoura un título oficial: a Liga da Terceira Autonómica 14-15. Estas son as súas estatísticas ligueiras ata o momento actual:

U.D. CERQUEDA
TOTAL LIGAS
P. X.	P. G.	P. E.	P. P.	G. F.	G. C.
509	209	101	199	822	753
LIGA DA COSTA
197	68	42	87	307	334

Desas 18 temporadas que leva disputadas o Cerqueda, tan só coincidiu co Baio en dúas delas. E foi nas dúas primeiras de existencia do club malpicán e ambas as dúas foron na Liga da Costa. O primeiro tivo lugar o 2 de novembro de 1980 e foi co Cerqueda como local, aínda que a vitoria foi visitante (0-2). No partido da segunda volta, disputado no Balsiño, foi o primeiro dos disputados en Baio e rematou con empate (1-1). Na seguinte temporada o Baio gañou no Balsiño (4-2), para empatar en terras malpicás (1-1). Polo tanto unha vitoria e un empate dos baieses nos partidos disputados como local, o mesmo que sucedeu como visitante.

Polo tanto, as estatísticas amosan unha vantaxe clara a prol do Baio, aínda que van alá 34 temporadas nas que non se enfrontan estes dous clubs.

Enfrontamentos Totais Liga
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
04	02	02	00	08	04
Xogados en Baio
02	01	01	00	05	03

O partido do domingo

O Cerqueda no Pinguel [Foto: FB Ponteceso]

Despois da vitoria pola mínima en terreo porteño, visita este domingo o Platas Reinoso o Cerqueda, equipo que nunca disputou un partido neste campo. Desde que volveu á competición na temporada 05-06, estivo na 3ª Autonómica ata que ascendeu na 14-15 á Liga da Costa. Disputa agora a súa segunda campaña consecutiva nesta categoría. Coa novidade de Raúl Periscal no banco, foron moitas as novidades que tivo no seu plantel esta temporada. A maioría delas viñeron do Larín (o veterano Míchel, Cristian ou o goleador Pablo López), do veciño Buño chegaron os irmáns Dani e Iván Mato, e así ata as recentes incorporacións de Mohamed e Cholo.

Ata 22 xogadores foron utilizados por Periscal na presente temporada, aínda que só dous deles, os veteranos Lorenzo e Míchel participaron en todos os encontros. Xunto a eles pódense considerar titulares Martín Castro, Dani Mato, Pablo López, Sergio Mato ou Dani García. Na portería Diego Dourado supera claramente a Richard, mentres que Cristian Méndez tras arrancar a campaña como suplente pouco a pouco foi entrando na titularidade; tamén parece afianzarse no once Abdu, ao igual que as fichaxes recentes Mohamed e Cholo. Iván Mato, lesionado, e Fran perderon un pouco o protagonismo, desde o banco adoitan aparecer Jonas, Bastón ou Vieites, entre outros.

Na actualidade figura na 9º posición, con 20 puntos, aínda que a súa progresión vai claramente de máis a menos. Pois o Cerqueda estivo no comezo da liga nas posicións altas, sendo incluso líder do grupo, pero nas últimas sete xornadas non coñeceu a vitoria. Comezou a liga con cinco triunfos en seis partidos, entre eles a vitoria en Camariñas na xornada inaugural; pero tras a derrota en Corme na xornada 7ª, veu o triunfo pola mínima co Corcubión e o empate na Ponte do Porto. Foi goleado na casa polo Mazaricos e empatou en Laxe para perder os últimos catro partidos, o último deles no derby co Malpica a pasada xornada. Sumou sete puntos como visitante, mercé a dúas vitorias (en Camariñas e Coristanco) e o empate na Ponte. É o segundo equipo menos goleador, con 16 (só o Cee marcou menos), pero tampouco encaixa moitos, pois suma en contra 25. Os seus goles están moi repartidos, pois os máximos goleadores son Iván Mato e Cristian Méndez, con tres tantos; están con dous, Lorenzo, Martín Castro e Míchel.

Non pode confiarse o conxunto baiés da mala xeira do club cerquedense, pois a pesar de perder nas últimas datas, sempre lles deu que facer aos seus rivais, como o demostra o seu encontro no Pinguel co Ponteceso.

SEGUNDA GALICIA (GRUPO 2º)

C.D. BAIO – U.D. CERQUEDA

Domingo 18 de decembro; 16:00 h.

Campo: Platas Reinoso (Baio).

Árbitro: Marco García Vázquez.

XUVENIL: C.D. BAIO – PONTECESO S.D.

Visita na tarde do venres o Ponteceso o Platas Reinoso nunha nova xornada da Liga da Costa Xuvenil, no seu Grupo Norte. E faino como aspirante a conseguir o título, pois só o separa un punto do actual líder, o Pedreiras Xuvenil, equipo que a semana pasada vencía, con máis apuros dos que mostrou o marcador final, ao Baio. O equipo pontecesán móstrase como un equipo consistente, que ten a Eloy na súa figura, un rapaz que xa conta para o equipo sénior, ademais doutros no centro do campo como Aday que lle dan un valor extra ao xogo do Ponteceso. Enfronte terá un Baio que non lles poñerá as cousas fáciles, pois vénse vendo partido tras partido que lle poden gañar a calquera e non será unha excepción este venres.

No encontro de ida, o Ponteceso sufriu para vencer por 2-1, pero non foi xusto o resultado cos baieses pois mereceran, canto menos, colleitar un empate daquel partido disputado tamén un venres.

XUVENIL (1ª Autonómica – Grupo 3º)

C.D. BAIO – PONTECESO S.D.

Venres 16 de decembro; 19:00 horas

Campo: Platas Reinoso (Baio).

Árbitro: Manuel Iglesias Bazarra.

VITORIA NA GRIXA, E XA CHOVERA!!!

C.F. PORTEÑO 0 - C.D. BAIO 1

Bieito volveu vestir a
camiseta do CD Baio

Despois de 46 anos, o CD Baio volveu gañar na Grixa, aínda que, todo hai que dicilo, nese tempo só cadraron en catorce temporadas. Pero as cifras estaban aí e das 16 veces que visitara o campo porteño só conseguira unha vitoria. E non foi fácil conseguila hoxe, nun partido de escaso xogo e moita loita, pois as reducidas dimensións do campo e o irregular do céspede así o impoñían. E iso que o tempo acompaña, e o sol estivo presente en todo o encontro, o que motivou que se achegasen máis de 200 persoas á Grixa. Aínda así a superioridade baiesa foi manifesta ao longo do encontro, pero non foi capaz de sentenciar e mantívose a incerteza no resultado ata o final. Hai que destacar o debut esta temporada de Bieito, que volveu vestir a camisola baiesa.

O partido iniciouse demostrando cada un as súas intencións, co equipo local atrás e deixando que o Baio se fixese co control do balón, e buscando as contras cos seus homes de ataque. Pola súa parte, o Baio fiel ao seu estilo pretendeu mover o balón, pero axiña comprobou que non ía ser tan fácil. A primeira ocasión viría para os locais na súa xogada recorrente, como é o saque de banda. Nun deles o balón é despexado pola defensa baiesa, pero cara á frontal onde Pepe Wii engancha unha volea que fai que Diego teña que lucirse e enviar a córner (min. 5). Algúns achegamentos con lanzamentos desviados por parte baiesa foron o preludio do primeiro e único gol do partido. Tras unha boa xogada de Javi Suárez por banda dereita, centra ao segundo pau onde Martín MC controla e fusila a Martín para poñer o 0-1 (min.17). Perdoou o segundo Javi Suárez nunha xogada rápida, co balón que sae de banda e o rápido saque de Martín MC puxo a Javi ante Martín pero este consegue sacar o balón a córner (min.20). Pouco máis significativo neste primeiro tempo, polo que se chegou ao descanso co marcador favorable aos visitantes.

O inicio do segundo período mostrou un xogo impreciso sen chegadas perigosas ata o cuarto de hora, na que o Baio empezou a chegar con xogadas combinativas. Nunha delas perdoou Rubio, que enganchou unha volea no punto de penalti pero foise por riba do traveseiro (min.59). E nova ocasión no min.66, na que Martín MC aproveita un balón peinado por Javi Suárez, e adiántase á saída de Martín, pero o balón sáelle alto e o seu remate sen deixala caer vaise fóra. E tería o propio Martín MC unha nova oportunidade ao atopar un balón solto na área, pero a rápida saída de Martín tápalle o disparo (min.73), xusto despois dunha xogada de Javi Suárez que entrou con vantaxe na área e un agarrón levouno ao chan sen que o colexiado sinalase nada. O Porteño non asomou polo ataque máis que en xogadas de saque de banda, e en balóns en longo buscando a cabeza de Roi Carril. Pero a incerteza do resultado facía que a emoción chegase ata o pitido final, e os locais puideron empatar nun saque de banda, que tras varios cabezazos de uns e outros ten que sacar Diego unha man prodixiosa para enviar a córner (min.85). Tivo Martín MC outra oportunidade despois dunha bonita xogada de Bieito por banda, que centra ao punto de penalti, onde a MC se lle vai o balòn no control (min.87). E coa vitoria pola mínima para o Baio chegouse ao remate do partido.

Novo triunfo do equipo baiés que o mantén empatado co líder Corme tras 17 xornadas. O vindeiro domingo visita o Platas Reinoso o Cerqueda, equipo co que non nos enfrontábamos desde a temporada 81-82. 

Ficha do partido da FGF

Clasificación da Liga da Costa

XUVENIL: C.F. PEDREIRAS XUVENIL 5 - C.D. BAIO 2

Visitaba na mañá do sábado o equipo xuvenil o campo das Pedreiras para enfrontarse ao equipo propietario do terreo de xogo, o actual líder do grupo, que levou un bo susto polo bo partido dos baieses que estiveron metidos no encontro ata practicamente o final do partido. Na primeira parte adiantouse en dúas ocasións o equipo local, pero no último minuto Alberto marcou un golazo que poñía o 2-1 co que se chegou ao descanso. Mediado o segundo período volveu poñer terra de por medio o equipo berdillés, pero un novo gol do Baio obra de Manuel Mª volvía meter o medo no corpo nas bancadas locais. Pero dous goles case consecutivos nos últimos cinco minutos deulles a vitoria aos berdilleses, máis ampla do que se viu no campo, e que lles permite aos locais seguir liderando a clasificación, cun punto de vantaxe sobre o Ponteceso, que será quen visite o vindeiro sábado o Platas Reinoso.

Ficha do partido da FGF

Clasificación do Grupo Norte 

 

PREVIA DO CF PORTEÑO-CD BAIO

A Historia

C.D. BAIO
TOTAL LIGAS + COPAS
P. X.	P. G.	P. E.	P. P.	G. F.	G. C.
1794	692	417	685	2941	2985
TOTAL LIGAS
1570	600	361	609	2504	2618
LIGA DA COSTA
808	318	156	334	1472	1545

 

Última visita do Baio á Ponte do Porto na 2010-11

O CD Porteño foi un dos oito fundadores da Liga da Costa na primavera de 1964, e desde aquel momento ata a actualidade participou en 36 temporadas, con cambio de denominación incluído, ao substituír o CD por CF. Nestes 53 anos deixou de participar durante dous períodos importantes, entre a temporada 65-66 e a 68-69 e entre a 83-84 e a 96-97. Esas 36 campañas supoñen que sexa o 20º dos clubs costeiros (empatado con Outes e Nantón), aínda que se nos atemos ao número de partidos xogados figura no posto 25º. Das 36 temporadas, 11 foron na 3ª Rexional/Autonómica e as outras 25 na Liga da Costa. Neste sentido, as campañas na liga costeira supoñen que ocupe o posto 16º (empatado cos veciños Soneira e Camariñas), pero por partidos xogados o seu lugar sobe á 22ª posición. O seu maior éxito veu na temporada 72-73, na que gañou a Copa da Costa ao imporse ao Carnota na final. Estas son as súas estatísticas ligueiras ata o momento actual:

C.F. PORTEÑO
TOTAL LIGAS
P. X.	P. G.	P. E.	P. P.	G. F.	G. C.
918	323	178	417	1634	2025
LIGA DA COSTA
634	181	124	329	1029	1546

Desas 36 temporadas que leva disputadas o Porteño, coincidiu en 16 co CD Baio, todas elas na Liga da Costa. O primeiro enfrontamento veu na temporada inaugural, o 17 de maio de 1964, no Balsiño, e os porteños impuxéronse por 1-2. Polo mesmo resultado gañaron os da Ponte no primeiro encontro xogado na Grixa, o 5 de xullo de 1964. Foron dúas das tres vitorias que sumara esta temporada o Porteño, que acabou levando o farol vermello.

Nas dúas primeiras temporadas o Porteño gañou todos os enfrontamentos co Baio, producíndose despois un impás de catro anos pola desaparición do club camariñán. Unha vez retornado na 69-70, e durante as seguintes once campañas coincidiron os dous clubs en dez delas (a excepción foi a 78-79, na que o Porteño estivo no Grupo Sur da Costa). Nelas o Porteño gañou todos os seus partidos como local menos dous: vitoria baiesa na 69-70 (1-2) e empate na 79-80 (0-0); e desas derrotas varias foron por goleada: 7-1, 6-1 e un par de 5-0. E nos xogados no Balsiño o Baio gañou 4 e o Porteño 2, e empataron nos 4 restantes.

Aspecto do campo da Grixa. [Foto: FB Ponteceso]

Desde esa 79-80 houbo 27 temporadas nas que non coincidiron os dous clubs, ben por estar en categorías superiores o cadro baiés, ben pola nova desaparición dos porteños. Desde a 07-08 foron catro campañas nas que os dous participaron na Liga da Costa, e dos oito enfrontamentos o Baio só gañou un, empatou cinco e perdeu dous. Estas dúas derrotas foron na Grixa, igual que dous dos empates. O último enfrontamento no campo da Ponte do Porto foi na 2ª volta da temporada 10-11, e rematou con empate (1-1). Nel xogaron polo Porteño: Asiel, Manuel, Roi (Piti 80’), Martín, Rubén, Quilmes, Brais, Ismael, Sestayo (Astu 70’), Iago (Wii 85’) e Varela (Óscar 75’). E polo Baio: Manuel, Matías, Mario, Ramón, Eloy, Martín, Pirucho, Fachal (Jorge 60’), Alberto, Canay (Bieito 73’) e Martín MC. O gol baiés fora obra de Martín.

As estatísticas son, polo tanto, moi favorables ao Porteño, que gañou a metade dos partidos xogados entre eles, e dobra aos baieses en goles marcados; e moito máis favorables son a dos encontros disputados na Grixa, onde o Baio só puntuou en catro ocasións. E da última e única vitoria xa choveu, pois pasaron máis de 46 anos, desde que o 14 de xuño de 1970 se impuxese por 1-2.

Enfrontamentos Totais Liga
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
32	06	10	16	35	70
Xogados na Ponte do Porto
16	01	03	12	13	49

O partido do domingo

Tras esta semana copeira, volve o domingo a Liga da Costa coa visita ao campo da Grixa, no que nos recibirá un Porteño que se mostra capaz do mellor e do peor no que levamos de campionato. Tras a súa salvación a temporada pasada grazas ao ascenso do Sp. Zas na promoción, o equipo sufriu un cambio coa chegada dun novo adestrador, Javier Baña, desde Camariñas, e con varias baixas no plantel. Subiron algúns xogadores desde o xuvenil, e recuperáronse xogadores que non xogaran a pasada campaña. As últimas incorporacións viñeron a comezos de novembro, coas fichaxes de Roi Carril (Club do Mar) e Rodrigo (Camariñas). Mestura un amplo grupo de xente nova, con algúns veteranos, como o xogador da canteira baiesa Mario Toja.

O Porteño no partido co Ponteceso [Foto: FB Ponteceso]

Ata 22 xogadores participaron co club porteño na presente temporada, con seis deles practicamente insubstituíbles, como son o porteiro Martín, xunto con Pejo, Marcos, Adrián, Jorge e Quilmes. Tamén podiamos incluír neste grupo a Cachi, que só faltou a tres encontros. Para os outros postos hai moitos candidatos: Piti, Porto, Cousillas, Pepe Wii, Mario Toja, Manuel ou o xuvenil Manoliño. E, claro está, nas cinco últimas xornadas foron da partida as dúas recentes fichaxes. Do banco, adoitan saír Adrián García, Castro ou Xoel.

Na actualidade figura na 11ª posición, con 16 puntos, dos que nove foron feitos na casa: dúas vitorias (Coristanco e Baíñas), tres empates (Corme, Cerqueda e Ponteceso) e dúas derrotas (Castriz e Mazaricos). Cómpre destacar o feito de que conseguiu igualar con equipos do potencial do Corme e do Ponteceso, e mesmo aos primeiros estivo a piques de gañarlles (marcara o Corme dous goles no desconto). Os goles están repartidos, pois levan 4 goles Jorge, Piti e Cachi; e con 3 están Marcos e Porto. En total marcou 24 goles, unha boa cifra, pero encaixou un total de 35, o que o converten nun dos máis goleados. Con todo, leva dúas xornadas sen perder (tres contando a Copa), e vén de gañar na Pedra Queimada ao Malpica (0-2), polo que está con moita moral para sacar algo positivo fronte ao Baio.

O conxunto baiés vén de dúas vitorias traballadas no Platas Reinoso, tanto na Liga co Corcubión como na Copa co Corme, e non pode confiarse na súa visita a un campo que nunca se lle deu ben. A ver se pouco a pouco se van recuperando os lesionados, e coa incorporación de Bieito, a competencia por un posto no once incrementa o nivel de cada xogador.

SEGUNDA GALICIA (GRUPO 2º)

C.F. PORTEÑO – C.D. BAIO

Domingo 11 de decembro; 16:00 h.

Saída de Baio ás 14:15 horas.

Campo: A Grixa (A Ponte do Porto).

Árbitro: Iago Varela Rodríguez.

XUVENIL: C.F. PEDREIRAS XUVENIL – C.D. BAIO

Tras dúas xornadas xogando como local, o equipo xuvenil do CD Baio desprazarase na mañá do sábado a terras berdillesas para enfrontarse ao Pedreiras Xuvenil, equipo pertencente oficiosamente ao San Lorenzo. O conxunto berdillés figura na actualidade como líder do grupo, cun só punto de vantaxe sobre o Ponteceso e catro sobre o Coristanco. A súa vantaxe sobre o cuarto, o Corme, é de dez puntos, polo que esta fin de semana pode certificar a súa presenza na segunda fase da liga. Tan só unha derrota no que vai de liga e dous empates, baseando o seu éxito no seu aspecto defensivo, pois só encaixou 15 goles, non sendo o que máis marca, pois os 42 están por debaixo dos realizados polos seus rivais polo título. O dianteiro Brais, con 16, e Álex con 8, son os seus máximos goleadores. Leva catro vitorias consecutivas despois de perder en Coristanco e empatar co Zas, e quererá certificar a súa clasificación este sábado. Pero para iso terá que superar ao Baio, que sumou un punto menos que os berdilleses nas últimas seis xornadas, que o asomaron ao grupo perseguidor dos tres cabeceiros, encontrándose ademais coa difícil tarefa do gol, co que estaban reñidos nas primeiras xornadas.

Na primeira volta, o equipo berdillés impúxose con claridade no marcador (0-4), pero foi un partido máis igualado que o que reflicte o resultado final e en boa parte do encontro os baieses puxéranlles as cousas moi complicadas aos seus opoñentes. Agardemos que co visto nas últimas semanas saiba plantarlle cara e traer algo positivo das Pedreiras.

XUVENIL (1ª Autonómica – Grupo 3º)

C.F. PEDREIRAS XUVENIL – C.D. BAIO

Sábado 10 de decembro; 12:00 horas

Saída de Baio ás 10:30 horas.

Campo: As Pedreiras (Berdillo).

Árbitro: Miguel Antonio González Rey.

A COPA DA COSTA É ASÍ

C.D. BAIO 5 - CORME C.F. 2

Porto abriu o marcador
cun gol dedicado a Peke

Partido 200 do CD Baio na Copa da Costa o disputado este martes festivo ante o Corme, os dous primeiros da Liga da Costa e que deron mostra do porqué desa clasificación. Un auténtico partido copeiro o vivido no Platas Reinoso, con goles, polémica e unhas bancadas con dúas afeccións que apoiaron ao seu equipo os noventa minutos. É que na tarde outonal, pero calurosa, houbo un grande ambiente no campo, con case 400 afeccionados.

O partido comezou cun Corme máis ofensivo que nos partidos precedentes disputados entre ambos os dous, pois non lle valía o empate inicial. Chegaron así os primeiros achegamentos á meta de Recarey, o máis perigoso un remate alto de Alejo. Pero o Baio foise metendo pouco a pouco no encontro, e tras unha ocasión de Martín MC que enviou alto, parece que se facía co control do partido. Pero chegou a xogada polémica da tarde, tras unha perda de balón no inicio do xogo baiés, e tras unha rápida combinación entre a dianteira cormelá o balón chégalle a Lucas, que cae na área. Tras claros xestos por parte do árbitro indicándolle ao dianteiro que se levantase, e cando todos pensaban que ía pitar falta antideportiva, o colexiado cambia de idea e sinala penalti (en dez días segunda vez que lle ocorre ao Baio que o árbitro cambia de opinión o que pitara antes: inspiración divina?). Da transformación do penalti encargouse Alejo, que marca pegado ao poste o 0-1 (min.22). Este gol descentrou ao Baio, que viu como no min. 25 e tras saque de córner a favor unha rápida contra do Corme puxo a Alejo ante Recarey pero o seu disparo foise ao poste e despois ás mans do porteiro.

Aos poucos foi volvendo o Baio a controlar o partido e nunha xogada a balón parado chegou o empate. Foi un córner botado por Moreno e de testarazo no primeiro pau Porto poñía o 1-1 (min. 34). Puido o propio Porto anotar o seu segundo gol, pero o seu cabezazo noutro córner foise desviado. Co empate chegouse ao descanso despois dun primeiro tempo equilibrado.

Poker de Martín MC
para marcar diferenzas

Pero todo cambiou no comezo da segunda parte, onde a dupla Javi Suárez-Martín MC sentenciou o partido en menos dun cuarto de hora. A primeira xogada vén dun balón que recibe Javi en banda, é entrado en falta pero o balón chégalle a Martín MC, que sorprende a todos cun lanzamento desde case 40 metros que supera a Suso e entra pola escuadra para poñer o 2-1 (min.52). Este gol afectoulle ao equipo visitante, que non soubo capear o temporal que lles viña enriba. Nunha xogada rápida do cadro baiés, o balón chégalle a Javi Suárez que mete por alto para Martín MC que fusila a Suso para o 3-1 (min.56). E tan só dous minutos despois, de novo xogada de Javi Suárez que supera á defensa e cando vai rematar é agarrado por Dani e o árbitro sinala penalti. Encárgase de tiralo Martín MC e transformar o 4-1 (min.58). Con esta vantaxe o Corme baixou os brazos a pesar do apoio que seguía desde a bancada, pero non chegaban con perigo á área baiesa. Máis ben todo o contrario, e era o Baio o que tiña as ocasións. Puido redondear Rubio o seu bo partido cun gol, pero o seu remate mordido fóiselle fóra (min.73), e nunha xogada por banda Pedro presentouse na área, pero o seu disparo tamén se foi desviado (min.75). Quen non erraría sería Martín MC, hoxe en estado de graza, que marcaría o seu cuarto gol para poñer o 5-1 no marcador (min.79). Os dous equipos xa pensaron no vindeiro domingo e continuos cambios foi a tónica dos últimos minutos. Aínda así viría un último gol, ao roubar Alejo o balón e presentarse na área para bater de disparo cruzado a Recarey e poñer o definitivo 5-2 (min. 86).

Gran vitoria dun Baio, que, a pesar das moitas baixas que acumula semana a semana, mostrou un alto nivel competitivo e superou a un Corme que se mantiña invicto nesta temporada. O vindeiro rival na Copa será o Porteño, pero iso será unha vez que remate a liga, e nesta hai que centrarse agora. E precisamente será o equipo da Ponte do Porto o que visitemos o próximo domingo.

Ficha do partido da FGF