C. D. BAIO 1 - U. D. CORCUBIÓN 1
No partido disputado na tarde do domingo enfrontáronse o CD BAIO e o UD CORCUBIÓN ante un numeroso público que acudiu ao Platas Reinoso, e que non puido presenciar un bo encontro, que tan só mantivo o interese polo axustado do marcador. Posiblemente fose o peor partido dos baieses, nun partido que axiña tiveron de cara co gol de Eloy Vilas, que máis que serenar os ánimos parece que revolucionou aos xogadores locais, que en ningún momento puideron despregar o seu habitual xogo.
O gol do malpicán Eloy na primeira ocasión do encontro prometía un choque tranquilo para o Baio, pero a pesar de controlar o tempo do xogo nesta primeira parte, non conseguía fíar boas xogadas e crear perigo na meta visitante. Tan só hai que destacar unha clara ocasión de Jorge, que se presentou só ante o meta Iago, que conseguía despexar a córner o lanzamento do baiés. O Corcubión só creaba perigo a balón parado, e puideron empatar nun par de lanzamentos de córner, pero non encontraron a meta de Anxo.
A segunda parte non fixo máis que empeorar as cousas para os baieses, que non só perderon o control do partido, senón que viron como a presión dos corcubioneses os pechaba atrás e non conseguían saír do seu campo con perigo. Tampouco é que os visitantes creasen claras ocasións de gol, e o seu perigo seguíase reducindo ás xogadas a balón parado, pero o axustado do marcador mantiña nerviosos aos baieses. Os cambios realizados por Félix non modificaron o desenvolvemento do partido, e só algunha contra poñía o medo no corpo dos corcubioneses, como a que acabou cun lanzamento de Martín MC ao poste da portería de Iago, na máis clara ocasión dos baieses. Cando parecía que o partido ía rematar coa vitoria local, chegou a xogada desafortunada para os locais, cando nun lanzamento de córner o balón petaba na man de Christian no borde da área e o colexiado sinalaba o penalti. Encargouse Lema de transformalo con tranquilidade, e con el rematou o encontro, cun resultado máis que xusto para os méritos de un e de outro.
Haberá que agardar ao próximo domingo para darlle a volta a estes dous resultados negativos e retornar á senda do bo xogo e da vitoria. Con todo, seguimos na parte alta dunha liga cada vez máis igualada e na que calquera lle pode gañar a calquera.
Polo CD BAIO xogaron: Anxo, Mario, Chema, Ramón (Fredi 77'), Pablo, Yago, Martín, Eloy Vilas (Fachal 73'), Jorge (Christian 52'), Martín MC, Alberto.
Goles: 1-0 Eloy Vilas (4'), 1-1 Lema (89', p.).
Aquí vos van as fotos do partido xentileza de
Santi Díaz e
Santi Soneira:
XUVENIL: C. D. BAIO 1 - S. D. CORISTANCO 1
Se os maiores non están de bo pé, outro tanto se pode dicir do equipo xuvenil, que parece que a praga de lesións que sufriron semanas atrás, fixéronlle perder o nivel que demostraron no principio da liga. Unha primeira parte bastante frouxa dos baieses, que non conseguían mover con claridade o balón, con continuos erros, que por riba se viron incrementados coa mala sorte de encaixar un gol nunha xogada desafortunada, na que David desviou un centro cara á súa portería e despistaba a Guillermo, que non puido impedir que o balón se introducise no seu marco. Si mellorou na segunda metade o xogo dos baieses, que a base de esforzo e despregue físico cercaron a meta do Coristanco, pero non conseguían finalizar con éxito as xogadas, e houbo que esperar ao minuto 80 para que Santi Díaz aproveitase un rexeite do gardameta visitante a tiro de Alberto. Foi o porteiro bergantiñán o mellor sobre o céspede, demostrando gran seguridade, e impedindo que os locais se levasen a vitoria. Puidérona lograr no desconto nun espectacular remate de semichilena de Pollo, reconvertido en dianteiro, que pasou lambendo a escuadra.
Con este empate mantense o Baio no quinto posto, iso si, a tiro do terceiro posto que obstenta o Cabana. Pode achegarse este xoves no partido aprazado que teñen que disputar fronte ao Muxía, antes de que o sábado se inicie a segunda volta co derby fronte ao Zas.
Polo CD BAIO xogaron: Guillermo, Xoel, David (Anxo 57'), Pablo, Alberto, Fachal, Kevin, Carlos (Christian 45'), Cachopo (Hío 66'), Lucas (Pollo 82'), Santi Díaz.
CADETE: C. D. BAIO 2 - CABANA S. D. 4
No primeiro partido do campionato os baieses non puideron puntuar ante o potente Cabana, pero deixaron boas sensacións, sobre todo na primeira parte, na que conseguiron superar aos cabaneses, e mesmo chegaron ao descanso coa vitoria por 2-1. O empate visitante nos primeiros minutos da segunda parte, deixou un choque igualado, que se decantou de lado visitante contra o final nunha xogada desafortunada de Álex que introduciu sen querer o balón na súa meta nunha melé na área local; e o cuarto, nun lanzamento de falta xa no desconto, só serviu para finiquitar o partido.
Polo CD BAIO xogaron: Alberto, Javi Muíño, Miguel, Álex, Alfonso (Iago 65'), Fran, Oreiro, Pedro, José Antonio, Estefan, Javi.
Goles: 1-0 Oreiro (12'), 1-1 José Ángel (32'), 2-1 Fran (38'), 2-2 Nico (54'), 2-3 Álex (pp. 66'), 2-4 José Ángel (77').
INFANTIL: S. D. FISTERRA 1 - C. D. BAIO 3
Sensacional vitoria do equipo infantil baiés, que chegaba á fin do mundo para enfrontarse a un Fisterra que contaba por vitorias todos os seus encontros. Pero a seriedade dos rapaces adestrados por Pastoriza fixo que os tres puntos voasen do Ara Solis e viñesen para Baio, grazas aos goles do seu pichichi Anxo (2) e da colaboración dun defensa fisterrán que anotaron o terceiro en propia meta.
