A CICLOXÉNESE PASOU POR MAZARICOS

MAZARICOS C. F. 0 - C. D. BAIO 2

Agora que os xornalistas gustan tanto de darlle moito bombo a certos termos, descubrimos que esta fin de semana nos vimos afectados por unha cicloxénese. Acudimos ao dicionario na busca do significado exacto deste termo e atopamos: "Conxunto de procesos meteorolóxicos que dan orixe á creación de ciclóns ou ben á intensificación doutros xa existentes". E teño para min que exactamente isto é o que lle acontece ao CD BAIO, que este ano se deron unha serie de procesos e tamén que se intensificaron outros xa existentes para que pase coma un ciclón polos campos da Costa. Son xa once os partidos que leva sen perder o conxunto dirixido por Félix, e segue asentándose na parte alta da clasificación.

Pablo saca o córner, peina o defensa... [Foto: Santi Soneira]

No medio deste temporal chegaba na tarde do domingo o CD BAIO ao campo da Pedra de Ouro, na localidade do Pino do Val, campo que sufrira no día anterior as inclemencias do vendaval, levando canda el boa parte da cuberta das bancadas, polo que os espectadores que asistiron ao partido non puideron facer uso dos asentos e tiveron que estar a pé de campo. Por sorte, o tempo deu un respiro e mal que ben púidose presenciar sen problemas o partido. Presentouse o Baio coas baixas de Yago, Ramón e Manuel, e Félix optou por unha defensa de tres centrais en vista das condicións do campo, que a pesar de todo estaba mellor do que se podía agardar. Empezaron con forza os baieses e axiña chegaron as primeiras ocasións, e o primeiro gol. Este chegou como consecuencia dun saque de esquina que efectuou Pablo, o seu centro logo dun malentendido entre defensa e porteiro, entrou na portería logo de tocar sen querer o central mazaricano. O gol deu aínda máis tranquilidade aos baieses, que aproveitaban a presenza dos dous Martíns para levar perigo á área local, mentres que a defensa non pasou moitos apuros agás contadas chegadas. A pesar de algunha que outra ocasión chegouse ao descanso coa vitoria mínima.

...e primeiro gol de Pablo co CD BAIO [Foto: Santi Soneira]

Seguía polos mesmos derroteiros a segunda parte ata que Rubio aproveitou unha xogada de Martín MC para poñer o segundo no marcador e sentenciar o partido. Non tivo moita máis historia o partido, pois os baieses dedicáronse a conservar a renda adquirida e os locais non tiñan armas para crear perigo na tupida defensa. Tan só nos últimos dez minutos chegaron con perigo os locais, sobre todo en lanzamentos a balón parado, pero a defensa visitante mantívose firme e conseguiu deixar inmaculada a meta de Anxo.

Con esta vitoria o Baio mantense na terceira praza empatado co Cee, e a seis puntos do Esteirana. Agora espera o triple enfrontamento cos equipos do concello de Muros, comezando coa visita dos da capital muradá o vindeiro domingo.

Polo CD BAIO xogaron: Anxo, José Antonio, Chema, Mario, Fredi, Pablo (Eloy Lema 66'), Norberto, Eloy Vilas (Christian 83'), Rubio (Alberto 59'), Martín (Jorge 77'), Martín MC.

Goles: 0-1 Pablo (14'), 0-2 Rubio (53').

XUVENÍS/CADETES/INFANTÍS

Suspendidos todos os partidos das categoría base do CD BAIO previstos para esta fin de semana a causa do temporal. Na mañá do sábado acordouse suspender os partidos de categoría xuvenil CD BAIO - OUTES FC e infantil UC CEE - CD BAIO. Mentres tanto os cadetes acudiron á Rocheira para enfrontárense ao CORISTANCO, pero unha vez alí ambos os dous equipos e mais o árbitro viron que non se daban as condicións para a celebración do partido.