PUNTO A PUNTO, PARTIDO A PARTIDO

C. D. BAIO 1 - SP. ZAS 1

Na chuviñenta tarde dominical tiña lugar no Platas Reinoso o derby municipal entre dous equipos que viñan mostrando unha boa racha de resultados, e que chegaban en forma a este primeiro partido da segunda volta da liga. A pesar do tempo excelente afluencia de xente e enorme expectación nas bancadas, con numeroso público desexoso de ver un bo espectáculo, pero como acontece neste tipo de partidos ao final houbo máis emoción que xogo.

Once inicial do Baio no derby [Foto: Santi Díaz]

Presentábase o Baio coa baixa de Norberto, sancionado, mentres que o Zas sacaba o seu once de gala. A primeira parte foi para esquecer, con moito centrocampismo, moitos balóns perdidos e pouco achegamento ás áreas rivais. Intentou o Baio manexar o balón, fiel ao seu estilo de posesións longas, pero non conseguiu enfiar boas xogadas. Pola súa banda, o Zas esperaba máis agazapado atrás na espera de aproveitar algunha contra cos seus veloces puntas. E foi así como os visitantes tiveron as súas dúas mellores ocasións do partido. Dous balóns perdidos polo Baio no centro do campo, supuxeron dúas contras letais que milagrosamente errou Rubio. Na primeira un centro dende a banda dereita e a súa volea fóiselle fóra, e na segunda un pase en profundidade que envía demasiado cruzado ante a saída de Anxo. Do Baio en ataque apenas nada neste primeiro tempo, chegando ben ás proximidades da área pero sen atopar a maneira de superar a tupida defensa zasense. Intentárono Martín MC e Alberto, pero sen éxito. Co empate a ceros chegouse ao descanso dun pouco vistoso primeiro tempo.

Moito público no Platas Reinoso [Foto: Santi Díaz]

 

 

Co descanso, que serviu para o sorteo dun formidable tenreiro raza pinta, asentáronse un pouco as ideas no bando local e saíu no segundo tempo con máis forza. Eloy Vilas fíxose o dono do partido e el manexou as mellores xogadas en ataque do conxunto baiés. Foi o propio centrocampista malpicán o que ía conseguir adiantar ao Baio granzas a un sensacional chut dende fóra da área que varreu por completo as arañas da escuadra da portería que defendía Elías. O Zas acusou o golpe do gol e estivo varios minutos fóra do partido, pero foise repoñendo e achegándose á área baiesa, sobre todo en xogadas a balón parado. Tamén o Baio conseguía combinar, agora con mais espazos, a medida que o seu rival ía abríndose na procura de achegarse máis ao ataque. Tivo a sentenza Martín MC á media hora da reanudación, pero rematou fóra de primeiras cando se atopaba só en posición franca para marcar. Tamén Rubio puido conseguir o empate nun centro-chut que bateu no largueiro, na mellor ocasión dos visitantes na segunda parte. Xa co tempo esmorecendo, Yago, en boca de gol, rematou alto tras unha falta lateral botada por Martín. E no último minuto do choque chegou o tanto do empate, conseguido por Víctor Vecino de cabeza, logo de que un lanzamento de falta de medio campo fose peinado por un compañeiro e o deixase só ante Anxo. A pesar do mal corpo que lles deixou aos baieses o empate co tempo case cumprido, hai que dicir que o gol fixo xustiza ao visto no terreo de xogo, nun partido de escasas ocasións, iso si, as que houbo moi claras, e no que ningún dos dous fixo merecementos para moito máis. 

Con este empate leva xa o Baio dez xornadas sen perder, consolidándose nos postos altos da clasificación. Neste momento é terceiro, empatado a puntos co segundo, Cee, e a seis puntos do líder Esteirana. A próxima semana, toca visita ao sempre difícil Mazaricos, que no seu campo de herba natural ha de poñernos as cousas complicadas. O importante agora é ir partido a partido, e ir sumando segundo se poida.

Polo CD BAIO xogaron: Anxo, José Antonio, Chema, Mario, Pablo, Yago, Martín, Eloy Vilas (Fredi 87'), Rubio (Jorge 68'), Martín MC, Alberto (Christian 82').

Goles: 1-0 Eloy Vilas (60'), 1-1 Víctor Vecino (89').

XUVENIL: S. D. CORISTANCO 0 - C. D. BAIO 6

Na mañá do sábado xogou o CD BAIO o último partido da primeira fase da liga xuvenil, un encontro no que ningún dos dous se xogaba nada, pois ambos os dous quedaron fóra da posibilidade de loitar polo título costeiro. Así e todo os xuvenís baieses quixeron despedirse con bo sabor de boca e fixeron un moi bo partido, pasando por riba do Coristanco, que apenas presentou batalla ao principio do encontro. Un gol de Lucas e outro de Christian, puxeron o 0-2 co que se chegou ao descanso. Logo, na reanudación os baieses incrementaron o seu dominio e chegaron ao final á media ducia, grazas a cadanseus pares de goles, da parella atacante, Santi Díaz e Christian, completando este un novo hat-trick.

Con este resultado, o Baio queda clasificado na cuarta praza deste grupo 4º, e queda á espera do que aconteza na Copa da Costa, competición que terá este luns o seu sorteo.

Polo CD BAIO xogaron: Guillermo, Marcos (Hío 63'), Xoel, David, Pablo, Fachal, Kevin (Carlos 48'), Lucas, Anxo (Oreiro 57'), Christian, Santi Díaz.

Goles: Christian (3), Santi Díaz (2), Lucas.

CADETE: C. D. BAIO 1 - MUROS S. D. 4

Tamén na mañá do sábado xogaban os cadetes que dirixe Dani fronte a un Muros que ocupaba unha das últimas prazas, pero que non tivo moitos problemas para levar os tres puntos do Platas Reinoso. A pesar de adiantarse no marcador por medio de Estefan, os cadetes baieses vían como lles remontaban e incluso goleaban xa na primeira parte. Co marcador de 1-4 chegábase ao descanso e ese sería o resultado final. Malas sensacións están dando os rapaces nestes últimos partidos tras un comezo esperanzador, colleitando derrotas avultadas. Esperemos que sexan capaces de endereitar esta situación e volver á senda do bo xogo, que o que lles deu os bos resultados.

Polo CD BAIO xogaron: Alberto, Alejandra, Alfonso, Andrea, Javi Muíño, Fran, Pedro, Estefan, José Figueiras, Samuel, Cristian. Na segunda parte entraron Miguel, José Antonio, Javi e Santi.

INFANTIL: C. D. BAIO 0 - XALLAS DE SANTA COMBA C. F. 8

Como un ciclón pasou o equipo xalleiro polo Platas Reinoso e venceu con solvencia a un CD BAIO, que se mostrou debilitado pola ausencia do seu central Carlos e pola lesión tempraneira do capitán Sergio. Con todo, foi moi superior e demostrou o porqué da súa clasificación.

Polo CD BAIO xogaron: Julián (Cedrón 60'), Fran, Víctor, Queiro, Suárez (Manuel Mª 48'), Álex, Eloy, Iago (Dani 65'), Sergio (Ariel 14'), Anxo, Éver (Antía 63').