PREVIA DO CD BAIO-UD CORCUBIÓN

A Historia

C.D. BAIO
TOTAL LIGAS + COPAS
P. X.	P. G.	P. E.	P. P.	G. F.	G. C.
1792	690	417	685	2932	2981
TOTAL LIGAS
1569	599	361	609	2500	2616
LIGA DA COSTA
807	317	156	334	1468	1543

Última visita do Corcubión ao Platas Reinoso na 12-13

Fundada en 1972, a UD Corcubión vén participando ininterrompidamente 45 temporadas, co que ocupa o posto 8º entre os clubs costeiros neste aspecto, mais por partidos xogados é 9º. Chegou a disputar 3 temporadas na Rexional Preferente, 4 na 1ª Rexional provincial, 12 na 3ª Rexional/Autonómica e as outras 26 foron na Liga da Costa. Neste sentido é 13º en canto a temporadas xogadas, mentres que se nos atemos aos partidos disputados baixa ao 16º posto. Os seus maiores éxitos viñeron na década de 1980, nos primeiros anos co ascenso ata a Preferente, e nos últimos cos primeiros títulos: na 87-88 gañou a Copa da Costa, e na 88-89 veu o dobrete ao proclamarse campión da Liga e da Copa da Costa. Despois virían dous títulos máis da 3ª Rexional, nas temporadas 99-00 e 02-03. Ademais das dúas Copas da Costa gañadas ante o Laxe, perdeu outras dúas finais (na 78-79 e 79-80, ante Fisterra e Cee, respectivamente). Estas son as súas estatísticas ligueiras ata o momento actual:

U.D. CORCUBIÓN
TOTAL LIGAS
P. X.	P. G.	P. E.	P. P.	G. F.	G. C.
1283	483	245	554	2176	2367
LIGA DA COSTA
705	230	137	338	1117	1432

Nesas 45 temporadas que disputou o Corcubión, tan só en 11 coincidiu co CD Baio. Dez delas foron na Liga da Costa e a outra na 1ª Rexional provincial. O primeiro enfrontamento foi ademais o primeiro partido oficial do Corcubión, pois coincidiu na 1ª xornada da temporada 72-73. Tivo lugar no campo do Balsiño o 21 de xaneiro de 1973, e acabou con vitoria baiesa por 4-0.

Nas cinco primeiras campañas do Corcubión os dous estiveron na Liga da Costa, nas que os corcubioneses gañaron todos os partidos como locais, mentres que os disputados en Baio estiveron máis igualados (dúas vitorias para cada un, e un empate). Habería que saltar ata a 83-84 para que coincidisen de novo, neste caso na 1ª Rexional provincial, e nela o Baio goleou na casa e empatou fóra. De novo un salto ata a 89-90, na Liga da Costa, con vitoria baiesa nos dous encontros; e na seguinte vez, na 93-94, o Baio empatou na casa e gañou fóra.

Quince anos seguidos sen coincidir ata a 08-09, na que o Baio gañou no Platas Reinoso e goleou no Novo Cubaleiro; pequeno salto ata a 11-12, con vitoria dos locais nos respectivos partidos e a última vez foi na 12-13. Nesta, Baio e Corcubión empataron no Platas Reinoso (1-1) e na segunda volta golearían os baieses en Corcubión (1-4). Nese último encontro xogado en Baio xogaron polo equipo baiés: Anxo, Mario, Chema, Ramón (Fredi 77’), Pablo, Yago, Martín, Eloy Vilas (Fachal 73’), Jorge (Christian 52’), Martín MC e Alberto; mentres que polos corcubioneses xogaron: Abelleira, Paulo, Senra, Lema, Conguito (Vale 68’), Sebas (Miguel 83’), Pablo Lestón, David (Jonnie 45’), Alán, David Lourido e Javi (Edu 45’).

Polo tanto, as estatísticas xerais son lixeiramente favorables ao Baio, sobre todo na segunda metade, pois dos últimos doce partidos xogados o Corcubión gañou un e empatou tres. En canto aos xogados en Baio o club local mantén unha superioridade non moi ampla, pois os corcubioneses lograron puntuar en cinco das once visitas, aínda que en canto a goles a vantaxe é clara. Como vimos, o Corcubión empatou na última vez que xogou en Baio, pero para falar da última e única vitoria temos que remontarnos á temporada 76-77 (0-2).

Enfrontamentos Totais Liga
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
22	10	05	07	39	26
Xogados en Baio
11	06	04	01	22	07

O partido do domingo

O domingo chega un Corcubión cun comportamento un tanto irregular, pero que compite en todos e cada un dos encontros, pois só en dúas ocasións perdeu por máis de dous goles de diferenza. Cunha proposta dun fútbol atractivo, nótase a man do seu adestrador, Emilio Corzón, coñecido da afección baiesa pois pasou por todos os equipos de base do CD Baio. Tras o ascenso da temporada pasada, este ano presenta un plantel moi similar. As principais novidades veñen do Ameixenda, do que chegaron Antón Lestón, Nes e Antón Trillo.

Once do Corcubión no Pinguel [FB Ponteceso]

Utilizou Emilio ata o momento 25 xogadores, mais uns oito parecen sempre fixos na titularidade. Na portería Abelleira apenas lle deixa oportunidades a Beto, mentres que Gabri, Tito, Pablo e Iago Lema son insubstituíbles; a canda eles, Antón Lestón, Toja, Nes, Sebas e Adrián Ozón figuran a cotío no once inicial. Mario Suárez e Alán pelexan por entrar nese once, mentres que o dianteiro Rodrigo adoita ser o primeiro cambio ofensivo. Mario Atán, José Mª Senra ou Samuel Rama tamén figuran entre os futbolistas con opcións a ser titulares.

O Corcubión figura na 14ª posición, con 12 puntos, no medio dese grupo dos nove últimos que se move nese ratio de tres puntos que hai entre o 10º e o último. Os puntos viñeron de catro vitorias, pois non empatou ningún partido, sumou 20 goles a favor e encaixou 31, o que o converte no 3º equipo máis goleado. Os triunfos viñeron repartidos como locais (ante Cee e Porteño) e como visitantes (co Coristanco e Baíñas). O seu máximo goleador é Nes, con 6 goles, seguido de Toja, con 4, e Antón Lestón e Rodrigo levan 3. Vén o equipo de tres derrotas seguidas, ante San Lorenzo, en Ponteceso e a goleada ante o Malpica, no que foi o peor partido dos corcubioneses.

Non pode fiarse o Baio pois veñen tocados no orgullo despois desa dura derrota, e debe manter a intensidade do partido vivido en Corme, no que se escapou a vitoria nos minutos finais. E tamén debe centrarse nesta competición, pois a proximidade da Copa da Costa pode desviar a atención dun encontro importante para seguir na parte alta da clasificación.

SEGUNDA GALICIA (GRUPO 2º)

C.D. BAIO – U.D. CORCUBIÓN

Domingo 4 de decembro; 16:00 h.

Campo: Platas Reinoso (Baio).

Árbitro: Ángel Acuña Piñeiro.

XUVENIL: C.D. BAIO – S.D. LAXE

Por segunda semana consecutiva xoga o equipo xuvenil do CD Baio como locatario, e nesta ocasión visita o Platas Reinoso o Laxe, despois do excelente partido do pasado sábado ante os seus veciños de ría, o Corme. E, como no caso dos maiores, no debe fiarse o equipo baiés da clasificación do seu rival, pois xa na primeira volta puxo en apuros aos rapaces de Roberto.

O Laxe é penúltimo con só 6 puntos, mercede a dúas vitorias, e é o equipo máis goleado do grupo, con máis de catro goles encaixados de media por partido, e ten a Santi, con 5 goles, como o seu máximo realizador. Perdeu os sete últimos partidos, a última pola mínima ante o Sp. Zas (2-3), ao que lle fixo sufrir. Por iso non deben confiarse os baieses e seguir na boa liña de xogo que mostraron nas últimas semanas, que lles valeu encontrarse cos resultados positivos. Verémolo este sábado en horario matinal.

XUVENIL (1ª Autonómica – Grupo 3º)

C.D. BAIO – S.D. LAXE

Sábado 3 de decembro; 12:00 horas

Campo: Platas Reinoso (Baio).

Árbitro: Gonzalo Belmonte Martell.