13 PARTIDOS DESPOIS...

Christian non xogaba desde a x.2ª

Pouco público se deu cita no campo de Xaviña para presenciar o partido da penúltima xornada da Liga da Costa que xa celebrou o cadro baiés a semana pasada. Tarde calorosa e ambiente de partido con pouco en xogo que lle permitiu ao adestrador visitante dar entrada a varios dos xogadores menos habituais, entre eles o dianteiro Christian, que por motivos laborais non xogaba desde o mes de setembro. Como é preceptivo antes do encontro a UD Cerqueda fixo o típico "pasillo" ao CD Baio polo título ligueiro.

Principiou máis enchufado o cadro local, polo menos nas xogadas á beira da área. O Baio tiña a posesión do balón pero non conseguía inquietar a meta cerquedense, e en cambio, os locais si que asustaban cada vez que se achegaban pola portería de Recarey. A primeira ocasión chegou nas botas de Méndez, que se presentou ante o meta baiés, pero este sacou o pé e desviou o balón que se foi chorando lambendo a base do poste (min.8). Na seguinte non erraría Méndez, quen logo dun saque de falta e tras prolongación de Míchel consegue colocar o pé para apartar o balón do alcance de Recarey e marcar o único gol do encontro (min.20). A primeira boa ocasión baiesa veu dunha boa xogada por banda esquerda na que Eloy chega a liña de fondo e o seu centro non consegue rematalo Christian na beira da área pequena e Santi Díaz chega a rematar no segundo pau, pero xa moi forzado envía fóra (min.33). Tivo Méndez unha nova oportunidade clara, logo de que Iván lle roubase o balón aos defensas baieses e cedese para un Méndez só ante Recarey, pero o seu remate saíulle mordido e foise fóra (min.38). A ocasión máis clara dos baieses estivo nas botas de Bieito, quen tras un pase entre liñas de MC se presentou ante o porteiro local, pero o seu remate a colocar saíulle moi frouxo e non tivo problemas o gardameta en atallar o balón (min.40). Coa vitoria pola mínima chegouse ao descanso.

Non cambiou moito a decoración na reanudación, co Baio intentando marcar o gol do empate a través da posesión e o Cerqueda disposto a roubar e saír á contra. Un par de tiros desde fóra da área de Santi Díaz foron o prolegómeno doutro lanzamento máis perigoso no que o extremo zurdo se topou coa base do poste, sen que ninguén aproveitase o rexeite (min.56). Os cambios e a calor fixeron baixar aínda máis o ritmo do encontro, pero aínda así houbo algunha ocasión, como un lanzamento desde a frontal de Martín que sacou en espectacular intervención Richard a córner (min74), ou outro roubo de Iván pero no súa internada na área disparou contra Costa (min.76). Este mesmo xogador intentaríao nalgunha outra contra, pero con lanzamentos moi desviados. A ocasión de empatar chegoulle a Martín MC cun remate de cabeza no segundo pau, pero o seu remate en posición franca foise fóra (min.88), e rematou o partido coa vitoria local.

Derrota do CD Baio que corta a xeira de 13 vitorias seguidas, pero que se pode permitir o cadro baiés, pois xa ten os deberes feitos. A vindeira semana queda pechar a temporada ligueira co enfrontamento ante o Laxe, para centrarse a partir de entón na Copa da Costa.

Ficha do partido da FGF

Clasificación da Liga da Costa