TRES LIGAS DA COSTA E UNHA PROVINCIAL

Desde que se fundou a Liga da Costa na temporada 1963-64 o CD Baio participou en todas as temporadas, pero tan só conseguiu catro títulos ligueiros: tres Ligas da Costa e unha Liga provincial da 1ª Rexional. Agora facemos un repaso destes títulos:

TEMPORADA 1982-83: CAMPIÓN DA LIGA DA COSTA

Directivos e xogadores que conseguiron a 1ª Liga da Costa

Na 20ª temporada da Liga da Costa por fin o CD Baio conseguía o seu primeiro título, o de campión da Liga da Costa. Ata aquela altura os únicos méritos que conseguira o club eran catro farois vermellos, moitos menos dos que a lenda futbolísta costeira lle imputaba, pero que o club baiés levou con tal deportividade que o incorporou ao escudo. Pero esta temporada todo cambiou. Unha boa fornada de xogadores locais que un lustro antes gañaran a liga de xuvenís, xunto coa chegada de tres fisterráns (Ayala, Dito e Manín, este na dobre faceta de xogador e adestrador), déronlle un salto de calidade ao club.

Tras unha gran loita co Soneira SD, 17 partidos seguidos sen perder, dos cales catorce foron vitorias, sentenciaron a liga, e na visita a Vimianzo na penúltima xornada o Baio xa era campión. O equipo do Balsiño gañou 22 dos 28 partidos disputados, con tres empates e outras tantas derrotas; conseguira marcar 84 goles e encaixara 29, sumando un total de 47 puntos (cinco máis que o Soneira). Para redondear a temporada o CD Baio tamén gañaría a súa primeira Copa da Costa, tras eliminar sucesivamente a Xuventude de Bergantiños, Sp. Bértoa, Esteirana, Carnota e, na final, ao Coristanco.

Presidido o club por Julio Diaz, confiárase o asalto ao título nun dos grandes xogadores da historia da Liga da Costa, o fisterrán Manín. Con el como adestrador, estes eran os xogadores que disputaron aquela temporada histórica: Lolo e Serafín (porteiros), Ayala, Braulio, Busto, Dito, Eduardo, Gonzalo, Javier, José Antonio, Juan Calabanda, Loliño, Manín, Marcos, Muíño, Paco, Santi Díaz, Santi Núñez, Suso, Tasende e Toja.

TEMPORADA 1990-91: CAMPIÓN DA LIGA DA COSTA

Directivos e xogadores que gañaron a 2ª Liga da Costa

A primeira liga conseguida na temporada 1982-83 supuxera o ascenso á 1ª Rexional na seguinte temporada, 83-84, na que o club baiés quedou subcampión e ascendeu á Rexional Preferente. Cinco temporadas estivo nesta categoría (da 84-85 á 88-89), e dela baixou por vontade propia para xogar na Liga da Costa que por esta altura estaba encadrada no Grupo II-B da 1ª Rexional. Sería na segunda campaña nesta liga costeira na que o CD Baio volvería saborear os meles do triunfo.

Especial de La Voz sobre o CD Baio

Dous equipos veciños, o CD Nantón e o Sp. Zas, foron este ano os seus grandes rivais na loita polo campionato. O equipo baiés principiou ben, pero dúas derrotas consecutivas nas xornadas 5ª e 6ª fixeron que os nantoneses se fosen na clasificación. A partir de aquí estivo o Baio 17 partidos sen perder, o que o levou á cabeza da táboa, aínda que non puido certificar o título matematicamente ata a última xornada. O CD Baio gañou 19 dos 34 partidos, empatou 12 e só perdeu 3; conseguiu marcar 93 goles e encaixou 29, para sumar un total de 50 puntos (un máis que o Nantón e catro sobre o Sp. Zas).

Fora este o ano da estrea ligueira do Platas Reinoso (xa se xogara a Copa o ano anterior), cun club presidido por Pepe Muíño, que buscara no coristanqués José Antonio Moreira o adestrador que levase ao Baio ao máis alto. Novamente a práctica totalidade do cadro de xogadores saíra da canteira baiesa e era este: José Carlos e Lolo (porteiros), Braulio, Costa, Fariña, Feal, Fran, Gati, Gerardo, Gómez, Javier, Juan Eiroa, Lilo, Loliño, Marcos, Pepe, Reyes, Santi Díaz, Santi Núñez, Sergio e Vázquez.

TEMPORADA 1994-95: CAMPIÓN 1ª REXIONAL PROVINCIAL

Directivos e xogadores que gañaron a liga provincial

O segundo título da Liga da Costa colleitado na 90-91 supuxo a posibilidade de ascender á Rexional Preferente -lembremos que a liga costeira estaba encadrada na 1ª Rexional-, pero a nova xunta directiva que saíu elixida para a temporada 91-92 renunciou ao ascenso. E tamén renunciou a facelo na nova 1ª Rexional provincial que se creara ese ano, decidindo competir na Liga da Costa, que agora a Federación volvera colocar na 2ª Rexional. Tres temporadas estivo nesta categoría o equipo baiés, para ascender na 93-94 grazas ao subcampionato acadado. Xogaría, logo, o Baio na 1ª Rexional provincial na temporada 94-95, e aquí chegou un novo título para as vitrinas baiesas.

Especial do Ideal sobre o CD Baio

Tardou en adaptarse á nova categoría o Baio, e na xornada 7ª sumaba xa cinco derrotas, co que pechaba a clasificación. Pero a reacción non se fixo esperar e unha xeira impresionante de 26 partidos invicto colocouno de líder e máximo favorito ao título. A igualdade na parte alta fixo que ata a penúltima xornada o CD Baio non puidera cantar o alirón e proclamarse campión desta 1ª Rexional provincial. Sumara nas 38 xornadas 22 vitorias, 10 empates e 6 derrotas (lembremos que cinco foran no inicio ligueiro), con 82 goles a favor e 44 en contra, para sumar 54 puntos, catro máis que o Cee e o Español.

Loliño, o único xogador
que gañara as tres ligas 

O equipo presidido por Touriñán confiáralle o banco ao malpicán Moncho Varela, que conformara un plantel con algúns xogadores veteranos que daban as súas últimas tardes de gloria no club baiés, xunto cun grupo de rapaces que dúas temporadas antes gañaran a liga xuvenil e conseguiran o ascenso á Liga Galega, na que aínda se encontraba, polo que moitos destes alternaban os dous conxuntos. O plantel de xogadores que lograron gañar a liga da 1ª Rexional provincial eran: Braulio e Norberto (porteiros), Bareta, Canillas, Chema, David, Fariña, Gerardo, Guillermo, Javi Capador, Javier Beiro, Loliño, Manolito de Dumbría, Mario, Nando, Pastoriza, Pena, Rolando, Santi Pastoriza, Silvariño, Touriñán e Víctor.

TEMPORADA 2016-17: CAMPIÓN DA LIGA DA COSTA

Martín en 1991 e 2017

Tras o ascenso da campaña 94-95 á Rexional Preferente, o CD Baio estivo catro temporadas nesta categoría (ata a 98-99), para descender á 1ª Rexional provincial. Sete temporadas estaría o club baiés no grupo provincial, desde a 99-00 ata a 05-06, na que baixou polos arrastres das categorías superiores (fora 13º). Outras sete campañas seguidas estivo na Liga da Costa, encadrada na 2ª Autonómica, ata que logra o ascenso na 12-13, na que fora subcampión e lograra subir na promoción. Tres anos estivo na 1ª Autonómica semiprovincial, ata que na última, a 15-16, baixou de novo por culpa dos arrastres (outra vez fora 13º). Así chegamos á actual 16-17 na Liga da Costa, e 26 temporadas despois o CD Baio volvía conseguir o título costeiro.

Mantendo a base da temporada pasada o equipo baiés era un dos favoritos do grupo, pero as dúbidas afloraron tras as derrotas nas xornadas 2ª e 7ª, pero 11 partidos seguidos sen perder puxérono na parte alta, por detrás dun intratable Corme. A terceira derrota na xornada 19ª ante un rival directo como o San Lorenzo fixo saltar de novo as alarmas, pero a partir de aquí leva 13 vitorias consecutivas que lle valeron para conseguir matematicamente o título.

Santi Díaz e Costa
Os pais gañan a Liga
da Costa 1991

Baixo a dirección do adestrador carballés Pedro Gómez, estes son os xogadores que disputaron esta liga co CD Baio: Cedrón, Diego, Julián e Recarey (porteiros), Bieito, Brais, Christian, Costiña, Eloy, Fachal, Fran, Fredi, Isaac, Javi Suárez, Josiño, Luis, Mario, Martín, Martín MC, Moreno, Norberto, Pedro, Peke, Porto, Ramón, Rubio, Santi Díaz, e Yago.

Santi Díaz e Costiña. Os fillos gañan a Liga da Costa 2017