A VIDA SEGUE IGUAL

CORME C.F. 1 - C.D. BAIO 1

O CD Baio estreou nova equipación patrocinada por GASTHOF

Impresionante partido o disputado no Cairo entre dous dos mellores equipos da Liga da Costa, cun grande ambiente nas bancadas, con máis de 300 espectadores nunha tarde solleira, que só tivo como punto negativo a actuación arbitral, pois o trío que foi designado para impoñer xustiza non estivo á altura dun encontro desta importancia. Non adoitamos falar aquí de actuacións arbitrais, pero hoxe temos que facer unha excepción para reflectir a estraña actuación dun colexiado ao que lle quedou grande o partido. Fóra de decisións máis ou menos atinadas, en varias ocasións o colexiado rectificou a súa primeira decisión para desesperación de xogadores e seareiros, que non saían do seu asombro, ademais de amosar un enorme número de cartóns para o visto no terreo de xogo, cando son dous dos conxuntos máis limpos do campionato.

En todo caso, os xogadores foron os protagonistas do encontro, e disputaron un partido vibrante, igualado, e algo menos tolo que o celebrado hai vinte días no torneo copeiro. Os dous trataron de minimizar riscos e manter as costas gardadas antes que botarse ao ataque sen mirar atrás. Todo puido cambiar no minuto 6, cando un erro de Norberto ao ceder atrás déixalle o balón franco a Alejo, pero o seu forte remate é despexado por Diego, o balón vai ao traveseiro e volve atrapar o gardameta. A seguinte ocasión clara tería que esperar á media hora, e veu dunha xogada por banda de Martín MC que centra ao corazón da área e Javi Suárez libre de marca remata de cabeza fóra. E a terceira e última grande ocasión desta primeira metade chegou no último minuto, nunha contra levada por Martín MC, que cede en profundidade para Javi Suárez, que se interna na área e cando vai rematar un defensa parece que o derruba. O árbitro sinala penalti, e cando todos estaban xa dispostos para o lanzamento, linier incluído, o colexiado cambia de idea e marca falta a favor do Corme. Coa xente pasmada chegouse ao descanso sen goles, nun primeiro tempo moi igualado.

Martín marcou o gol 2500 en liga do Baio

Principiou a segunda parte co Baio controlando máis o partido, e un Corme máis acazapado, deixando só a Alejo arriba cun Lucas de mediapunta, pero os demais máis pechados atrás. E aos 56 minutos chegou o gol do Baio, nun lanzamento de falta que marcou Martín de forte lanzamento. Histórico gol 2500 en campionato ligueiro do club baiés, que quixo dedicarllo ao ex-porteiro e delegado Manuel, que se operou esta semana e que se atopaba na bancada. O colexiado, a instancias do linier, sacoulle cartón a Martín MC, para rectificar de novo e sacarllo a Martín. Puido matar o partido aí o Baio pois ao Corme sentoulle mal o tanto, e non atopaba o seu xogo a pesar de ter superioridade numérica no centro do campo. Pero nestas chegou un centro sen apenas perigo que detivo con comodidade Diego, pero o colexiado apreciou falta na protección que Norberto fixo do seu porteiro sobre a chegada de Lucas e sinalou penalti, ademais de expulsar a Norberto por ver o segundo cartón. Alejo non fallou e empatou o partido (min.76). Aquí o Corme ulíu o sangue o veuse arriba e a piques estivo de gañar nun remate de cabeza de Lucas, que desviou Diego a córner en felina intervención (min.83). Pero tamén puido gañar o partido o Baio, nun saque de falta rápido de Martín MC sobre Moreno que se internou na área e o seu lanzamento quedou entre as pernas de Illote (min.89). Cun novo rifirrafe por outra decisión arbitral, que lle sacou cartón a Martín MC por perda de tempo, e as protestas dos locais que reclamaban a expulsión, pois moitos descoñecían a rectificación que fixera antes, entre eles o propio linier que tampouco coñecía o erro anterior. Rematou o partido co colexiado tratando de xustificar as súas decisións ante uns e outros, pero o público quedou cun bo sabor de boca dun partido disputado e bonito, no que calquera dos dous puido gañar e o empate deixa as cousas como estaban, máxime cando os perseguidores tamén empataron.

XUVENIL: C.D. BAIO 4 – CORME C.F. 0

Dentro do dobre enfrontamento entre baieses e cormeláns, na tarde do sábado viviuse o primeiro capítulo coa celebración do partido entre os xuvenís dos dous clubs. E os que estiveron no Platas Reinoso puideron ver un excelente encontro do conxunto local, que deu mostra do fútbol que levan dentro os seus futbolistas. A primeira parte estivo máis igualada ata que chegou o primeiro gol baiés, que veu dun lanzamento de falta que remata Luis, despexa o porteiro pero o balón rebota en Manu Bermúdez e introdúcese na súa propa portería. Puido Santi marcar o segundo, pero o seu lanzamento foise fóra, antes de chegar ao descanso.

No segundo tempo, o Baio plantouse ben atrás concendendo poucas oportunidades aos visitantes de achegarse á meta de Cedrón, e o gran traballo defensivo deu os seus froitos en ataque. David Mohedano aproveitaba un rexeite do porteiro para fusilar a meta cormelana e sentenciar o partido. E chegarían dous goles máis para o Baio obra de Sergio, o primeiro tirando a colocar á escuadra desde fóra da área, facendo inútil a estirada do porteiro; e o segundo logo dun córner ensaiado, rematando de cabeza un centro de Josiño. A superioridade local foi incontestable e o bo traballo de todos fixo que sumasen un cómodo triunfo, mantendo a boa liña que se via nestas últimas semanas. A vindeira semana, novo partido na casa, pois visita o Platas Reinoso o Laxe.