PREVIA DO CD BAIO-UD MONTE LOURO

A Historia

C.D. BAIO
TOTAL LIGAS + COPAS
P. X.	P. G.	P. E.	P. P.	G. F.	G. C.
1788	687	416	685	2921	2979
TOTAL LIGAS
1565	596	360	609	2489	2614
LIGA DA COSTA
803	314	155	334	1457	1541

Última visita do Monte Louro ao Platas Reinoso na 12-13

O primeiro domingo de novembro visita o Platas Reinoso a UD Monte Louro, club fundado en 1981, e que disputa coa actual a súa 33ª temporada, non todas consecutivas pois non competiu nas campañas 89-90, 90-91 e 10-11. Ocupa o posto 25º entre os clubs costeiros que máis temporadas particiaron e o lugar 27º en canto a partidos disputados. Desas 33 tempadas, 13 foron na 3ª Rexional/Autonómica e as outras 20 na Liga da Costa; o que fai que nesta competición figure como o 23º en canto a temporadas e o 25º no tocante a partidos xogados. Non conta con ningún título nas súas vitrinas, mais si co honorífico "farol vermello", que colleitou nada menos que en oito ocasións, iso si, case todos nas súas primeiras temporadas. Estas son as súas estatísticas ligueiras ata o momento actual:

U.D. MONTE LOURO
TOTAL LIGAS
P. X.	P. G.	P. E.	P. P.	G. F.	G. C.
843	260	154	429	1272	1721
LIGA DA COSTA
561	123	102	336	679	1289

Nestes anos que leva competindo esta vai ser a sexta vez que coinciden Baio e Monte Louro no mesmo grupo, todas elas na Liga da Costa. A pesar de fundarse o Monte Louro en 1981, o seu primeiro enfrontamento é relativamente recente, pois data do 24 de setembro de 2006. Tivo lugar no Platas Reinoso, e venceu pola mínima o cadro local, 2-1, con dous goles de Martín.

Catro temporadas coincidindo (desa 06-07 á 09-10), para chegar á última campaña na que cadraron, que foi na 12-13. E foi casualmente nesta, na súa xornada 4ª, cando o Monte Louro gañou no Platas Reinoso por vez primeira, co resultado de 1-2; goles visitantes de Álvaro e Ancho, e de Martín MC para os locais. Dos convocados naquel partido por parte louresa tan só cinco continúan no plantel (Isma, Pedro, Pablo, Raúl e Geiko).

As estatísticas globais son realmente parellas, cunha mínima vantaxe baiesa, que só na temporada 09-10 foi superior claramente ao seu rival ao gañar 3-0 en Baio e 1-3 en Louro, mentres que as outras vitorias foron sempre pola mínima. En canto aos partidos xogados no Platas Reinoso, o Baio gañou tres deles, empatou o da temporada 08-09 (1-1) e perdeu o xa comentado da 12-13.

Enfrontamentos Totais Liga
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
10	05	01	04	18	16
Xogados en Baio
05	03	01	01	10	06

O partido do domingo

A UD Monte Louro preséntase nesta súa volta á Liga da Costa logo do ascenso do ano pasado con 9 caras novas, moitas delas moi novas, como as de Yeray (Dumbría xuvenil), Manu de Yi (Esteirana xuvenil) ou Miguel (Os Miúdos xuvenil), mentres que recupera a xogadores que abandonaran a práctica do fútbol federado (Isma ou Raúl) e do Carnota chegan os veteranos José Ángel e Manolo da Chouza. Todos eles comandados polo novo adestrador, Óscar Leis, que despois de moitos anos no fútbol base do CF Dumbría colle un equipo de afeccionados da Liga da Costa.

11 da UD Monte Louro no Pinguel [Foto: FB Ponteceso]

Non principiou con bo pé a súa andadura, cunha contundente derrota ante o Corme (1-7), pero axiña se refixo e conseguiu gañar en Corcubión (3-4) e despois ao Porteño (4-3); estivo a piques de sorprender ao Cerqueda (3-2) e empatou co Laxe na casa (2-2), para despois caer derrotado contra Baíñas, San Lorenzo e Ponteceso. A semana pasada, no que din que foi o seu mellor partido, conseguiu gañarlle ao Malpica por un claro 3-1. Ata 27 xogadores participaron xa de algún minuto co Monte Louro esta temporada, varios deles xuvenís, o que pode ser índice de que o adestrador aínda está buscando o equipo base. Mais parece que algúns son fixos nas aliñacións, como é o caso de Yeray, Abel, Raúl, David, José Ángel, Riki e Geiko, aos que poderiamos sumar o porteiro Santi e o recentemente incorporado Manolo da Chouza. Os xuvenís Juan de Celia e Adrián, e Isma, Pedro, César ou Miguel tamén foron varias veces da partida.

O Monte Louro figura na actualidade na 13ª posición, con 10 puntos, empatado coa Esteirana e o Coristanco. Leva convertidos un total de 17 goles, o que fai que sexa o 5º máximo realizador da liga, mentres que na súa contra encaixou 28 goles, dato que o coloca como o equipo máis goleado, empatado co Porteño. Os seus goles repártense fundamentalmente entre tres homes, pois Geiko suma 5, e con cadanseus 4 están Riki e o xuvenil Juan de Celia.

O Baio, despois da vitoria colleitada en Castriz, quere continuar na boa senda e seguir presionando ao líder Corme. Non deberá confiarse e lembrar o sucedido a última vez que xogaron no Platas Reinoso, pois o Monte Louro conseguiu a vitoria a pesar de que esa temporada o Baio acabase ascendendo e o Monte Louro descendendo. Tamén hai que ver como lles afecta aos dous equipos o partido de Copa xogado entre semana e como chegan fisicamente pois non están afeitos a xogar tres partidos nunha semana. A solución o vindeiro domingo no Platas Reinoso.

SEGUNDA GALICIA (GRUPO 2º)

C.D. BAIO – U.D. MONTE LOURO

Domingo 6 de novembro; 16:15 h.

Campo: Platas Reinoso (Baio).

Árbitro: Marcos Ordóñez Rodríguez (Preferente).

XUVENIL: S.D. SOFÁN – C.D. BAIO

Principia a segunda volta coa visita dos nosos xuvenís a Sofán, aínda que nesta ocasión o partido vaise xogar no municipal das Eiroas. O cadro carballés ocupa actualmente a 9ª posición do grupo, con cinco puntos, conseguidos dunha vitoria e dous empates. Un deses empates foi o colleitado na primeira volta en campo baiés, nun encontro no que os locais andaban curtos de efectivos, e que lograron empatar nos últimos minutos a pesar de contar cun xogador menos. Despois da avultada derrota da semana pasada os baieses seguen na 6ª posición, pero xa ameazados pola parte baixa. Esperemos que a nova volta sirva para volver ao camiño dos triunfos e das alegrías, pois hai calidade para logralos.

XUVENIL (1ª Autonómica – Grupo 3º)

S.D. SOFÁN – C.D. BAIO

Sábado 5 de novembro; 16:30 horas

Saída de Baio ás 15:00 horas.

Campo: As Eiroas (Bértoa-Carballo).

Árbitro: Samuel Pardo Pose.