PREVIA DO CORME CF-CD BAIO

A Historia

C.D. BAIO
TOTAL LIGAS + COPAS
P. X.	P. G.	P. E.	P. P.	G. F.	G. C.
1791	690	416	685	2931	2980
TOTAL LIGAS
1568	599	360	609	2499	2615
LIGA DA COSTA
806	317	155	334	1467	1542

Recente partido de Copa
[foto: Fin Lema]

Desde que se fundou en 1980, o Corme CF vén competindo ininterrompidamente, polo que son 37 as temporadas que leva en activo. Con este número ocupa o posto 18º entre os clubs costeiros, mais se miramos polo número de partidos subiría ata o 15º. Desas campañas 7 foron na 1ª Rexional/Autonómica provincial ou semiprovincial, 3 na 3ª Rexional e as outras 27 na Liga da Costa. Estas temporadas fai que se sitúe na 11ª posición, mentres que se nos atemos aos partidos xogados sería 10º nesta categoría. Curiosamente, o pasado domingo chegou aos 800 partidos na Liga da Costa, que son seis menos que os disputados polo Baio. Os seus éxitos veñen dados pola consecución de 3 Ligas da Costa (87-88, 95-96 e 13-14) e 1 Copa da Costa (98-99), á parte de perder outra final deste torneo (14-15). Estas son as súas estatísticas ligueiras ata o momento actual:

CORME C.F.
TOTAL LIGAS
P. X.	P. G.	P. E.	P. P.	G. F.	G. C.
1116	450	227	439	1782	1900
LIGA DA COSTA
800	335	169	297	1342	1329

Desde que se fundou, o Corme coincidiu co Baio en 18 temporadas, das que 4 foron na 1ª Rexional/Autonómica e o resto na Liga da Costa. O primeiro enfrontamento foi o 1 de febreiro de 1981, en terreo cormelán, que rematou con empate (1-1).

As estatísticas globais marcan unha superioridade do conxunto baiés, pois só perdeu no 25% dos enfrontamentos. Máis igualadas están nos partidos disputados en Corme, cunha lixeira vantaxe do equipo cormelán, que suma unha vitoira máis. Estas confrontacións tiveron un distinto signo ao longo da historia. Nas tres primeiras temporadas consecutivas, os rexistros móstranse bastantes igualados, aínda que na 82-83 o Baio campión de liga gañou con solvencia os dous partidos. Para que se volvesen atopar haberá que esperar ata a 89-90, e durante catro temporadas, o Baio gañou tanto os partidos xogados na casa como en Corme, algún deles por goleada. O novo ascenso do Baio ata a Preferente fixo que pasasen varios anos sen cadrar no mesmo grupo. Isto produciuse na 1ª Rexional Provincial, e foi nas 99-00 e 00-01, con vitoria de cada un na súa casa na primeira, e dobre triunfo baiés na segunda.

Tras o descenso do Baio á Liga da Costa na 06-07, os dous disputaron sete campañas consecutivamente no mesmo grupo. Nelas o Baio non gañou ningún partido como visitante, e o máximo que logrou foi empatar en tres ocasións, mentres que o Corme empatara dúas veces en Baio e gañara noutra. Co ascenso dos dous á 1ª Autonómica semiprovincial, volveron coincidir nas dúas últimas temporadas; nas dúas gañou o Baio como local, e no Cairo deuse un empate (2-2) na 14-15 e vitoria do Corme (2-0) na 15-16.

Polo tanto, e a pesar da igualdade das estatísticas en terreo cormelán, o Baio non gaña como visitante desde a 00-01 (1-5), cando os dous equipos estaban na 1ª Rexional Provincial.

Enfrontamentos Totais Liga
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
36	20	07	09	85	47
Xogados en Corme
18	06	05	07	35	29

O partido do domingo

o 11 do Corme contra o Ponteceso [Foto: FB Ponteceso]

Este domingo chega o enfrontamento máis interesante da xornada e quizais do que vai de liga, pois disputado máis dun terzo da competición, os dous figuran na cabeza da clasificación, empatados a puntos, aínda que por goles ocupa o Corme o liderato. Cun plantel practicamente similar ao do ano pasado, as únicas novidades subliñables son a fichaxe de Uru (Malpica), que veu suplir a baixa de Juan Chans; mentres que o outro troco está na volta de Lente ao banco, que fai que o equipo reverdecese os éxitos que colleitou con el ao mando.

Ata o momento utilizou 19 xogadores, dos que 3 son aínda xuvenís, pero con importancia no equipo. Alternándose Suso e Illote na portería, son oito os xogadores que podemos considerar fixos, pois participaron de inicio na práctica totalidade de partidos. Son estes Jesús, Alejandro e Pandi, na defensa; o xuvenil Eloy, Lucas, Brais Corral e Uru, no medio; e Alejo e Toniño na dianteira. Aínda que Alejandro e Toniño poden actuar en calquera posición do campo. Para os outros postos pelexan Adrián Doldán, Dani Cousillas ou Sergio Sueiro. Do banco adoitan saír normalmente Brais Torrado, Diego Bermúdez ou os xuvenís Manu Bermúdez e Aitor.

O Corme mantense nesa primeira posición sen perder ningún partido, mentres que empatou tres deles, un na casa (co Mazaricos) e dous fóra (con Cee e Porteño). Conta por vitoria os seis últimos partidos, cunha gran facilidade goleadora. Pois é o máximo goleador do grupo, con nada menos que 42 goles, o que significa unha media de 3'5 goles por partido, mentres que é o segundo menos goleado, con 14 tantos encaixados. O máximo goleador, e do grupo, é Alejo, que leva 17 goles; a el séguenlle Toniño con 6, Lucas con 5, e con 3 están Eloy e Sergio Sueiro.

O Baio leva tamén unha boa xeira, con cinco vitorias consecutivas, e chega a este importante partido con boas sensacións, e co recordo do recente encontro da Copa da Costa disputado no Cairo a comezos deste mes que rematou en empate. Agardemos que os dous conxuntos rememoren ese partido e nos ofrezan un espectáculo similar cheo de goles e ocasións.

SEGUNDA GALICIA (GRUPO 2º)

CORME C.F. - C.D. BAIO

Domingo 27 de novembro; 16:00 h.

Saída de Baio ás 14:15 horas

Campo: O Cairo (Corme).

Árbitro: Héctor Pérez Álvarez.

XUVENIL: C.D. BAIO – CORME C.F.

Esta fin de semana teremos dobre confrontación Baio-Corme, pois tamén na liga xuvenil van xogar estes dous equipos, neste caso no Platas Reinoso. Tras a brillante vitoria a semana pasada en Camariñas, cun gran despregamento atacante que fixo que se desen moitas oportunidades de gol, recibe ao Corme para refrendar o seu bo estado de xogo. Non o poñerá fácil o equipo cormelán, que grazas ás últimas vitorias (4 nos últimos 5 partidos), meteuse de cheo na loita polo título e por meterse na segunda fase ligueira. Ocupa actualmente a 4ª praza con 25 puntos, pero ten o terceiro a dous puntos e a catro o liderato. O seu máximo goleador, Manu Bermúdez (con 8), é un habitual das convocatorias do equipo sénior, como tamén o é, aínda que menos, o segundo, Aitor (con 5).

Na primeira volta o Baio conseguiu empatar no Cairo (2-2), mais o resultado non fixera xustiza á superioridade mostrada polos baieses en moitas fases do encontro, no que quizais foi o mellor partido do Baio na primeira volta. Agardemos que se repita o visto na ida, e o conxunto baiés volva ofrecer a súa mellor versión.

XUVENIL (1ª Autonómica – Grupo 3º)

C.D. BAIO – CORME C.F.

Sábado 26 de novembro; 16:15 horas

Campo: Platas Reinoso (Baio).

Árbitro: Ángel Acuña Piñeiro.