C.D. BAIO 2 - U.C. CEE 0
Mario volveu aos campos despois de varios meses |
Cun
equipo visitante pechado atrás o Baio intentaba mover o balón, pero
este non fluía coa velocidade doutras veces e as imprecisións eran
constantes. Moi poucas ocasións de gol neste período, e tan só
podemos salientar a ocorrida no min.18, cando logo dun córner
dispara Martín MC desde fóra da área e o balón rexéitao Paulo,
Isaac adiántase á defensa e consegue disparar pero de novo Paulo
intervén para desviar a córner. A segunda ocasión foi o primeiro
gol baiés, que chegou dun pase en profundidade de Martín cara a
Martín MC que se presenta ante Paulo, ao que deixa sentado
cun quebro e marca a pracer (min.33). Pouco máis que contar desta
primeira parte, na que o Cee non chegou a pisar a área local.
Saíu
o Baio na segunda metade disposto a sentenciar o encontro, pero non
estivo atinado de cara a porta. No min.47 recibe Martín na frontal
da área e lanza a colocar ao segundo pau pero sae lambendo o poste.
Dous minutos despois triple ocasión despois de que o balón chegase
a Martín MC que lanza un potente disparo que bate no traveseiro e
bota dentro do campo, o balón chega a Javi Suárez que centra para
Rubio pero o seu disparo sácao Paulo e volve de novo para Martín
MC, que con apenas ángulo dispara ao lateral da rede. No min. 61 o
Cee quedaría cun home menos ao ver Julito o segundo cartón amarelo
ao cortar unha internada de Martín MC na área. No lanzamento desa
falta por parte de Martín, nin os atacantes conseguen rematar con
claridade nin a defensa sacar o balón e este chega a Isaac que lanza
un potente disparo que bate no pau. Acosaba o conxunto baiés, e tras
un erro do porteiro na saída do balón aprovéitase Martín MC, que
o supera por alto e cando se cantaba o gol Chema saca de cabeza baixo
paus a córner. No lanzamento do córner remata Rubio e Paulo lúcese
enviando a córner. Fon minutos de agobio do equipo local, que non
aproveitou para sentenciar, pero tampouco se vía perigo no Cee, a
pesar dalgún intento de Juan por achegarse á meta de Recarey.
No
minuto 80 produciuse o debut esta temporada de Mario, logo da lesión
sufrida a finais da temporada pasada. E un minuto despois chegou o
segundo gol local, nun balón servido polo propio Mario sobre Javi
Suárez, e o centro deste buscando no segundo pau a Martín MC é
interceptado por Noé, marcando na súa propia portería.
Puido anotar o terceiro da tarde Javi Suárez nunha grande
oportunidade, pero desaproveitou un man a man con Paulo, que
conseguiu desviar a córner (min.87).
Suma
trinta puntos con este triunfo o conxunto baiés, que o mantén
empatado co líder Corme. E a vindeira semana enfrontaranse os dous
no Cairo, nun partido que nin moito menos vai ser decisivo pero si
moi importante para a moral dos dous equipos.
XUVENIL:
CAMARIÑAS F.C. 4 – C.D. BAIO 7
Chuvia
de goles no Hermanas Patiño na tarde do sábado, que veu acompañar
a mala tarde climatolóxica que tiveron que soportar os xogadores dos
dous conxuntos. Principiou enchufado o equipo local, e o seu goleador
Brandon marcaba o primeiro no min.4, e só dous despois outro dos
habituais das convocatorias do equipo sénior, Pablo Mouzo, poñía o
2-0. Pero reacionou moi ben o conxunto baiés, e Mohedano e Santi
poñían o empate antes da media hora; e aínda viñeron máis pois
antes do descanso Efe e Mohedano poñían un claro 2-4.
Meteuse
de novo no partido o Camariñas ao marcar de novo Brandon, pero dous
minutos despois Manuel María poñía terra de por medio. Chegaron
nos minutos finais tres goles máis, primeiro Fran puxo o 3-6, e ao
minuto seguinte Pablo Suárez recurtaba distancias e xa no desconto
Sergio marcaba o definitivo 4-7. Moi bo partido dos baieses que
souberon reaccionar ao mal inicio e co paso dos minutos demostráronse
moi superiores e incluso puideron marcar máis goles e traer un
resultado máis contundente. Agora o Baio ten dous partidos seguidos
na casa, ante Corme e Laxe, nos que ten a oportunidade de seguir
sumando puntos e demostrar o seu bo momento de xogo.
No hay comentarios:
Publicar un comentario