PREVIA DO CAMARIÑAS FC-CD BAIO

VISITANDO A NOSA "BESTA NEGRA"

A Historia

C.D. BAIO
TOTAL LIGAS + COPAS
P. X.	P. G.	P. E.	P. P.	G. F.	G. C.
1784	688	410	686	2936	2989
TOTAL LIGAS
1558	595	354	609	2498	2623
LIGA DA COSTA
800	312	155	333	1449	1536

Esta fin de semana toca visita a un dos grandes clubs costeiros, o Camariñas FC, que disputa a súa temporada 40ª de maneira consecutiva, o que o converte no 12º equipo que máis temporadas participou, pero sobe ata o 8º posto en número total de partidos ligueiros (1278). Desas catro decenas de campañas, 3 foron na Preferente, 12 na 1ª Rexional provincial ou semiprovincial e as outras 25 na Liga da Costa (o 16º nesta clasificación), na que disputou 716 partidos (15º). Nestes anos colleitou un bo feixe de títulos, como 5 Ligas da Costa (78-79, 79-80, 87-88, 91-92 e 03-04) e 2 Copas da Costa (93-94 e 94-95), chegando outras dúas veces á final da Copa (80-81 e 86-87). Estas son as súas estatísticas ligueiras ata o momento actual:

CAMARIÑAS F.C.
TOTAL LIGAS
P. X.	P. G.	P. E.	P. P.	G. F.	G. C.
1278	581	270	427	2357	1924
LIGA DA COSTA
716	377	152	187	1474	918

Crónica de JMF (La Voz de Galicia)
da 1ª vitoria baiesa en Camariñas

A pesar dos moitos anos que levan competindo, o Baio e o Camariñas coinciden este ano por 15ª vez no mesmo grupo, 11 delas na Liga da Costa, tres na 1ª Rexional/Autonómica e outra na Preferente. O primeiro enfrontamento entre eles tivo lugar no Balsiño o 29 de xaneiro de 1978 (con empate 3-3), mentres que o primeiro xogado en Camariñas foi o 2 de abril dese ano, con vitoria local (1-0). Pódese dicir que o equipo camariñán é a besta negra do CD Baio, pois é co club que peores estatísticas ten. De feito, o Baio non conseguiu gañar ata o 14º enfrontamento, e foi precisamente no Hermanas Patiño, na temporada 94-95, na 1ª Rexional Provincial na que o Baio se proclamara campión. O resultado fora 1-2, o mesmo que se deu na 2010-11, que foi a segunda e última vez que gañou o Baio en Camariñas (e tan só empatou outra, na 90-91: 2-2). Se miramos os datos, os resultados dos partidos en Baio pouco melloran para o conxunto baiés. O último enfrontamento data da temporada 13-14, na 1ª Autonómica semiprovincial, con empate no Platas Reinoso (1-1) -na 1ª volta, o Camariñas gañara 2-0-.

Enfrontamentos Totais
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
28	04	05	19	28	58
Xogados en Camariñas
14	02	01	11	11	32

O partido do domingo

11 do Camariñas ante o Ponteceso [FB Ponteceso SD]

O Camariñas presenta un cadro de xogadores moi novo, iso si, baixo a experiencia do veterano Moriño, unha institución xa no equipo camariñán. Xunto a el continúan os Sergi, Nico, Soule ou o goleador Yuyo (autor a temporada pasada de 33 goles), e tamén Javier Antelo, que regresou a finais da campaña anterior logo do seu paso polo Dumbría Xuvenil. Este ano uníronse ao proxecto que dirixe Ángel Insua 'Rosquilleiro' varias fichaxes, como o porteiro Álvaro (Camelle), os chegados do Porteño Gaby e Carlos, do Dumbría Xuvenil retornou Maikel e para a dianteira volveu Nazo (Soneira), sen esquecernos de David Pasantes, este ano xa sénior. Xunto a eles varios xuvenís son sempre parte das convocatorias, con importante presenza dalgúns deles, como os Pablos -Suárez e Mouzo- e o goleador Brandón.

Actualmente ocupa o 7º posto na clasificación, con nove puntos, conseguidos de tres vitorias: en Laxe, e na casa ante Baíñas e a goleada ante o Ponteceso; as tres derrotas viñeron na casa co Cerqueda e nos seus desprazamentos a Berdillo e Malpica. Marcou un total de 14 goles, repartidos entre Yuyo (4), Brandón e Nazo (3), e Maikel e David (2), e encaixou 10 (encaixou algún en todos os encontros).

O Baio, cunhas estatísticas goleadoras similares (encaixou os mesmos goles, pero marcou tres máis), ten unha boa pedra de toque para demostrar o seu potencial, sempre influído por esa aliñación de astros que se parecen conxurar na súa contra cando xoga contra o Camariñas. Agardemos que as estatísticas sexan iso, meros números e que os rapaces de Pedro poidan vir do Hermanas Patiño cun bo resultado.

SEGUNDA GALICIA (GRUPO 2º)

CAMARIÑAS F.C. - C.D. BAIO

Domingo 16 de outubro; 17:00 h.

Saída de Baio ás 15:15 horas.

Campo: Hermanas Patiño (Camariñas).

Árbitro: Xavier Pérez Pol.

XUVENIL: PONTECESO S.D. - C.D. BAIO

Nova xornada na Liga da Costa Xuvenil, na que o Baio se despraza ao Pinguel na tarde do venres para enfrontarse ao Ponteceso, un dos equipos que figuran nas posicións altas da táboa, e que a pasada semana perdeu o liderato logo da súa derrota no derby en Corme. Agardarán ao Baio con ganas de volver á senda do triunfo, pero tamén os baieses necesitan dar un golpe na mesa e demostrar que o visto ata o de agora non ten nada que ver coa capacidade deste equipo. A dura derrota do sábado pasado ante o Pedreiras ten que servir para a reacción dos xuvenís que dirixe Roberto Lozano e loitar nun campo difícil por unha vitoria que melloraría a súa situación anímica.

XUVENIL (1ª Autonómica – Grupo 2º)

PONTECESO S.D. - C.D. BAIO

Venres 14 de outubro; 19:30 horas

Saída de Baio ás 18:15 horas.

Campo: O Pinguel (Ponteceso).

Árbitro: Felipe Gómez Otero.