PREVIA DO CD BAIO-SCRD ESTEIRANA

O PARTIDO 800 DO CD BAIO NA LIGA DA COSTA

A Historia

C.D. BAIO
TOTAL LIGAS
P. X.	P. G.	P. E.	P. P.	G. F.	G. C.
1557	594	354	609	2495	2622
LIGA DA COSTA
799	311	155	333	1446	1535

Chega este domingo o partido número 800 do CD Baio na Liga da Costa (recordando que recoñecemos por tal a actual 2ª Galicia, antes 2ª Autonómica/Rexional, con excepción das temporadas 86-87 á 90-91 que se correspondía coa 1ª Rexional). O CD Baio é o 5º equipo que máis temporadas participou nesta competición (empatado co UC Cee), mais por número de partidos ocupa o 9º posto, a só 2 e 3 partidos de Cee e Malpica, respectivamente, que acaban tamén hai escasas xornadas de alcanzar esa cifra redonda dos 800, pero lonxe dos 1224 do UD Carnota, que é o club que lidera esta clasificación e liderará durante moitos anos (o Ponteceso, segundo, leva 931 encontros). No cadro de arriba podedes ler as estatísticas do equipo baiés na Liga da Costa, e tamén na totalidade das outras ligas nas que participou.

A Esteirana visita este domingo de novo o Platas Reinoso

O rival deste encontro especial vai ser un equipo con soleira dentro da Costa, a SCRD Esteirana, que disputa este ano a súa temporada 46ª desde que se fundara en 1971, o que o converten no 7º equipo en número de temporadas, e o 11º en número de partidos no global de todas as ligas. Desas 46, 16 foron na 3ª Rexional, 3 na 1ª (unha na biprovincial e dúas na semiprovincial) e as 27 restantes na Liga da Costa. Os números nesta última competición sitúano no posto 11º en canto a temporadas disputadas, e no 14º en partidos xogados. Os seus maiores éxitos veñen dados por dúas Ligas da Costa (77-78 e 12-13) e unha Copa da Costa (74-75). Estas son as súas estatísticas ligueiras ata o momento actual:

S.C.R.D. ESTEIRANA
TOTAL LIGAS
P. X.	P. G.	P. E.	P. P.	G. F.	G. C.
1187	518	217	452	2372	2167
LIGA DA COSTA
723	309	132	282	1410	1363

A pesar dos moitos anos que levan competindo, o Baio e a Esteirana coinciden este ano por 15ª vez no mesmo grupo competicional, 13 deles na Liga da Costa, e os outros dous -os últimos- na 1ª Autonómica. O primeiro enfrontamento tivo lugar en Esteiro o 27 de febreiro de 1972 (2-4 para o Baio), e o primeiro en Baio foi no Balsiño o 20 de abril dese mesmo ano (1-0 para os locais). Cadraron os dous nesta primeira campaña da Esteirana e nas cinco seguintes, e logo habería que agardar ata a gloriosa -para o Baio- temporada 82-83 para que coincidisen de novo; pero máis houbo que agardar para novos enfrontamentos, pois ata a 2007-08 non houbo confrontación ligueira. A partir de aquí seis temporadas máis, a última delas a 14-15, cos dous clubs na 1ª Autonómica semiprovincial, sendo o último partido disputado o celebrado no Platas Reinoso, con vitoria baiesa (1-0).

Se lles botades un ollo ás estatísticas do cadro de abaixo, comprobaredes que nos enfrontamentos totais entre os dous equipo están bastante igualadas, mais no que se refire aos partidos disputados en terreo baiés, a vantaxe local é clara, e nos últimos sete partidos no Platas Reinoso gañou seis (perdeu 0-1 na 10-11).

Enfrontamentos Totais
P. X.	P. G. CD Baio	P. E.	P. P. CD Baio	G. F. CD Baio	G. C. CD Baio
28	13	03	12	55	56
Xogados en Baio
14	09	01	04	35	20

O partido do domingo

Unha renovación case total a que sufriu o equipo esteirán desde que coincidimos hai dúas temporadas na categoría superior. Daquel plantel tan só quedan uns cantos coñecidos, como Damián Suízo, Álex, Martín, Codesido ou Simón, ademais do míster Javier Lodeiro, que durante uns meses tamén adestrou o Baio. Moita xente nova nun cadro de xogadores escaso, pois tan só conta con 14 fichas de afeccionado, todos eles xa no club a temporada pasada (a única "incorporación" é Rafa, que deixou de ser xuvenil este ano). Evidentemente completa Lodeiro as súas convocatorias con rapaces do xuvenil, algún deles con moito protagonismo, como é o caso de Jaime ou Íker.

Equipo da Esteirana que gañou no Pinguel [FB Ponteceso]

Na actualidade a Esteirana ocupa o 9º posto na táboa clasificatoria, con 7 puntos sumados grazas ás súas vitorias fronte a Laxe e Ponteceso, e o empate colleitado co Malpica a semana pasada. Acusado de baixar o seu rendemento lonxe do Xosé Luís Vara, o triunfo no Pinguel hai dúas semanas vén confirmar que tamén pode ser perigoso como visitante, pois a ilusión dos novos dálle alas ao equipo. Encaixou nestes cinco partidos 11 goles e marcou un total de 10, repartidos do seguinte xeito: con 2 Álex e Adrián, e con 1 Martín, Pablo Rama, Eloy, Íker, Jaime e outro en propia meta. Polo tanto, nos seus encontros vense goles, pois a Esteirana marcou en todos os partidos e tan só o Ponteceso non foi quen de marcarlle.

Polo tanto, o partido co Baio, equipo tamén goleador, aínda que o pasado domingo só anotase un, promete ser entretido, con dous equipos buscando a porta rival. O cadro baiés non debe confiarse logo dos bos resultados acadados con equipos dos chamados importantes, e poñer toda a carne na grella, para que non se indixeste esta Esteirana con pel de cordeiro. Agardemos que poidan ir recuperándose os mancados Javi Suárez, Martín MC e Recarey, para que o míster poida dispoñer do maior número de efectivos para que o partido 800 do Baio teña un final feliz.

SEGUNDA GALICIA (GRUPO 2º)

C.D. BAIO – S.C.R.D. ESTEIRANA

Domingo 9 de outubro; 17:30 h.

Campo: Platas Reinoso (Baio).

Árbitro: Iván Miño Rojas.

XUVENIL: C.D. BAIO – C.F. PEDREIRAS XUVENIL

Na Liga da Costa Xuvenil visita o Platas Reinoso o Pedreiras Xuvenil, equipo de Berdillo que fai as veces do equipo de base do San Lorenzo, aínda que por asuntos burocráticos non o poida ser e oficialmente sexa un club independente. O caso é que o cadro berdillés é actualmente o colíder do grupo, empatado co Ponteceso, e con maneiras de equipo candidato a proclamarse campión, aínda que queda moita liga. Boa mostra diso deu no amigable disputado en Baio, que despois refrendou neste inicio ligueiro, no que gañou catro partidos e empatou o derby co Sofán. Xa que logo, é un equipo temible, pero tamén é certo que os xogadores baieses se crecen cos rivais a priori máis fortes e desaparecen cos máis propicios, como tivemos ocasión de comprobar nestas dúas últimas xornadas. Agardemos que os rapaces volvan ás sensación amosadas en Corme e brinden aos seus afeccionados un bo partido. Nin que dicir ten que unha vitoria baiesa engancharía o equipo nos postos altos, mentres que unha derrota afastaría o equipo carballés en moitos puntos na táboa clasificatoria.

XUVENIL (1ª Galicia – Grupo 2º)

C.D. BAIO – C.F. PEDREIRAS XUVENIL

Sábado 8 de outubro; 17:30 horas

Campo: Platas Reinoso (Baio).

Árbitro: Raniel Lucas Galvao Pimentel.